SPP kërkon ndërhyrje urgjente pas ndërprerjes së sigurimit shëndetësor për punonjësit e MPB-së

Sindikata e Pavarur e Policisë (SPP) ka bërë të ditur se po monitoron situatën lidhur me problemin e sigurimit shëndetësor të pjesëtarëve të Ministrisë së Brendshme, i cili është shfaqur sërish në Fondin e Sigurimeve Shëndetësore të Maqedonisë.

Sipas SPP-së, raste të tilla janë të papranueshme dhe nuk duhet të përsëriten në Fondin e Sigurimeve Shëndetësore, veçanërisht kur preket mbulimi shëndetësor i punonjësve të policisë.

Sindikata njoftoi se gjatë ditës do t’i dërgojë një letër Ministrit të Brendshëm, përmes së cilës do të kërkojë ndërhyrje të menjëhershme në Fondin e Sigurimeve Shëndetësore. Qëllimi është që problemi të zgjidhet sa më shpejt dhe të gjendet një zgjidhje e qëndrueshme, në mënyrë që një situatë e tillë të mos përsëritet në të ardhmen.

SPP thekson se do të vijojë angazhimin për mbrojtjen e të drejtave dhe interesave të anëtarëve të Ministrisë së Brendshme, duke reaguar sa herë që ato rrezikohen.

Që nga dje, asnjë prej punonjësve të Ministrisë së Brendshme nuk ka pasur sigurim shëndetësor. Për këtë arsye, pacientët janë kthyer mbrapsht nga kimioterapia, procedurat diagnostikuese dhe laboratorët, me arsyetimin se duhet të paguajnë shërbimet privatisht ose të presin deri në normalizimin e situatës./Telegrafi/