Sinoptikanët njoftojnë vijim të paqëndrueshmërisë atmosferike me rrebeshe lokale dhe maksimale deri në 38°C

Pasditja e së hënës solli në disa pjesë të territorit reshje që arritën nga 5 deri në 8 litra për metër katror. Megjithëse sasia e ujit nuk ishte shumë e madhe, intensiteti i lartë i rrebesheve krijoi probleme në disa rajone, duke përfshirë edhe dëme në prodhimin bujqësor. Nga terreni raportohet gjithashtu se rrugë të caktuara janë bilokuar për shkak të pemëve të rrëzuara, të cilat kanë ndërprerë lëvizshmërinë.

Kushtet e paqëndrueshme meteorologjike pritet të na shoqërojnë edhe gjatë ditëve në vijim, njoftojnë specialistët e motit, por reshjet do të jenë më tepër me karakter lokal dhe më pak intensive.

Sipas parashikimeve të Juliana Fidanoskës, sinoptik kujdestar, temperaturat për të martën do të shënojnë vlera nga 30 deri në 36 gradë celsius. “Të mërkurën dhe të enjten pritet një destabilizim i motit në zona të kufizuara, me shira të izoluar dhe të rrëmbyeshëm, shoqëruar me bubullima dhe erë të fortë, por paralelisht do të kemi rritje të temperaturave, të cilat mund të ngjiten deri në 38 gradë celsius”, theksoi ajo.

Vërshimet e javës paraprake lanë gjurmë të shumta në Shkup, duke mbajtur të bllokuara disa akse rrugore për shkak të ujit të akumuluar, ndërsa raportime të tjera folën për dëme materiale të shkaktuara nga depërtimi i ujit në banesa dhe bodrume.

Sektori i bujqësisë pësoi goditje të tjera nga rrebeshet e shoqëruara me breshër, duke rezultuar në kultura të prekura rëndë në zona të ndryshme. Pritet që institucionet përgjegjëse të përpilojnë një vlerësim të detajuar të situatës dhe të merren masa për riparimin e pasojave të shkaktuara.