Siljanovska-Davkova: Maqedonia ka përballuar barrë të paprecedentë në rrugën drejt BE-së, ndryshoi flamurin, emrin kushtetues dhe Kushtetutën

Gjatë fjalimit në Samitin e 22-të Evropian në Salzburg, në panelin me temën “A është Evropa (ende) një lojtar global?”, presidentja e RMV-së, Gordana Siljanovska-Davkova, deklaroi se asnjë shtet tjetër evropian që ka ndjekur rrugën e integrimit nuk është përballur me një barrë të ngjashme me atë të Maqedonisë.

“Në procesin tonë të integrimit evropian, kemi përballuar një barrë që nuk e ka mbajtur asnjë vend tjetër evropian: ndryshuam flamurin shtetëror, emrin kushtetues dhe miratuam 36 amendamente kushtetuese, pjesa më e madhe e të cilave u diktuan nga jashtë”, u shpreh Siljanovska-Davkova.

Presidentja theksoi se në fjalën e saj trajtoi të ardhmen e projektit evropian, sfidat strategjike që rëndojnë mbi Bashkimin Evropian dhe domosdoshmërinë e përshpejtimit të integrimit të Ballkanit Perëndimor, një proces ku BE-ja ka kontroll të plotë dhe kompetencë vendimmarrëse.

Duke vlerësuar ecurinë e vendit drejt BE-së, ajo tha se nga 35 vjet pavarësi, Maqedonia ka kaluar 21 vjet si kandidate për anëtarësim. Sipas saj, vendi ka marrë 17 raporte pozitive për hapjen e negociatave, ka arritur një nivel të lartë përafrimi me legjislacionin evropian dhe 100 për qind përputhshmëri me politikën e përbashkët të jashtme dhe të sigurisë. Ajo e renditi gjithashtu vendin ndër më të suksesshmit në reformat evropiane dhe në zbatimin e Planit të Rritjes së Ballkanit Perëndimor.

Siljanovska-Davkova ngriti pikëpyetje edhe mbi parimet evropiane, duke iu referuar detyrimit të një shteti për të ndryshuar kuadrin e tij të brendshëm ligjor për zgjidhjen e një mosmarrëveshjeje historike. “Kjo ngre pyetje serioze për qëndrueshmërinë e parimeve evropiane. Neni 4(2) i Traktatit të BE-së e detyron Bashkimin të respektojë barazinë e Shteteve Anëtare dhe identitetet e tyre kombëtare, të shprehura në strukturat e tyre themelore politike dhe kushtetuese. Megjithatë, në rastin tonë, një ndryshim kushtetues i kushtëzuar nga një mosmarrëveshje historike dypalëshe paraqitet si test i kapacitetit tonë demokratik”, tha ajo.