Sasho Klekovski, kandidati për Shëndetësinë që është mjek me diplomë, por pa përvojë në profesion

Sasho Klekovski, i propozuar për ministër të Shëndetësisë, ka përfunduar studimet në Fakultetin e Mjekësisë në UKIM dhe është mjek me profesion, por nuk ka asnjë ditë përvojë pune në këtë sektor. Në një intervistë për emisionin “360 Gradë” në MRT 1, ai deklaroi se, ndonëse kishte diplomuar me mesatare të lartë 9.7, zgjodhi të mos merrej me ushtrimin e mjekësisë, përcjell Nistori.

Siç tregoi ai, diplomimi i tij përkoi me një periudhë tepër të vështirë, kur sistemi shëndetësor ndodhej në kolaps. “Diplomova në një periudhë jashtëzakonisht të vështirë, kur sistemi shëndetësor ishte në kolaps. Tretësira fiziologjike blihej në farmaci dhe dërgohej në spital. Në kushte të tilla nuk pashë se si mund të kontribuoja. Prandaj vendosa të ndjek një rrugë tjetër profesionale. Në të njëjtën periudhë, së bashku me bashkëthemelues të tjerë, krijuam Qendrën Maqedonase për Bashkëpunim Ndërkombëtar në vitin 1993”, tha Klekovski, duke kujtuar punësimin e tij të parë.

Aktualisht, ai mban postin e kryetarit të Komisionit për Shëndetësi të VMRO DPMNE-së. Sipas rregullave të partisë, nuk i lejohet që në të njëjtën kohë të jetë edhe anëtar i Komitetit Ekzekutiv. I pyetur nëse largimi nga ky organ përbën ulje të pozitës së tij brenda partisë, Klekovski u shpreh: “Në momentin që pushova së qeni anëtar i Komitetit Ekzekutiv, u zgjodha kryetar i Komisionit për Shëndetësi.”

Ai u bë pjesë e Komitetit Ekzekutiv të VMRO DPMNE-së në vitin 2022. Edhe pse më herët kishte qenë i përfshirë në parti, ai thotë se që nga ai moment është aktivizuar më fort në strukturat partiake. Sipas tij, në përbërjen aktuale të Qeverisë, vetëm ministrja Sanja Bozhinovska ka më pak përvojë partiake se ai.

Sa i takon mungesës së përvojës së drejtpërdrejtë në sistemin shëndetësor, Klekovski vlerësoi se kjo sjell edhe përparësi. “Avantazhi është se e kuptoj atë që më thonë punonjësit shëndetësorë, sepse e njoh gjuhën e profesionit. Nga ana tjetër, fakti që nuk kam punuar në sistemin shëndetësor do të thotë se nuk i përkas asnjë grupi interesi. Nuk kam interesa të lidhura me kirurgjinë, me Shkupin, Manastirin apo me qarqe të caktuara farmaceutike. Kjo më ndihmon të jem më objektiv në vlerësimet e mia. Sa më gjatë të jesh pjesë e një sistemi, aq më shumë rritet subjektiviteti.”

Duke folur për aktivitetin e tij politik, ai tha se përfshirja ndër vite e ka ndihmuar të kuptojë më mirë funksionimin e partisë. “Kam qenë koordinator për Aerodromin, Karposhin, por edhe për Brvenicën dhe Krushevën. Kjo të jep mundësinë të kuptosh dallimet dhe pritjet e qytetarëve. Përveç kësaj, përmes Qendrës Maqedonase për Bashkëpunim Ndërkombëtar kam vizituar më shumë se 200 fshatra në të gjithë vendin, prandaj besoj se e njoh mirë Maqedoninë.”

Me ristrukturimin e Qeverisë, Klekovski pritet të kalojë nga detyra e drejtorit të Fondit të Sigurimeve Shëndetësore në postin e ministrit të Shëndetësisë. Ai është kandidati i tretë për këtë funksion në qeverinë e kryeministrit Hristijan Mickoski, pas largimit të Arben Taravarit dhe Azir Aliut.

Ndërkaq, në Kuvend kanë mbërritur propozimet e kryeministrit për shkarkimin dhe emërimin e anëtarëve të rinj të Qeverisë. Seanca plenare ku do të shqyrtohen këto propozime është caktuar për 13 korrik. /Nistori/