Rregulla të reja për vjeljen e boronicave në Parkun Kombëtar “Mali Sharr”, banorët e Malësisë së Tetovës shprehin pakënaqësi

Në këtë periudhë nis sezoni i boronicave, frut pyjor që kërkohet në masë si në tregun vendor, ashtu edhe jashtë vendit. Vjelja dhe tregtimi i tyre përbëjnë çdo verë një burim të rëndësishëm të ardhurash për banorët e Malësisë së Tetovës.

Banorët vendas, megjithatë, thonë se po përballen me konkurrencë të pabarabartë, pasi në Malin Sharr mbërrijnë për të mbledhur boronica edhe qytetarë nga Kosova, Shqipëria dhe qytete të tjera të vendit. Ata pretendojnë se, që prej shpalljes së Malit Sharr Park Kombëtar, kufizimet e vendosura ndaj popullsisë lokale nuk zbatohen në të njëjtën mënyrë për të gjithë.

Besim Abdija, banor i Shipkovicës, deklaron se boronicat shiten me një çmim prej rreth 500 denarësh për kilogram, ndonëse mbledhja e tyre është punë e lodhshme dhe kërkon shumë përpjekje. Sipas tij, fshatarët ndëshkohen kur presin dru për nevojat personale, ndërkohë që personat që vijnë nga jashtë për të vjelë boronica nuk kontrollohen sa duhet.

Abdija thotë se boronica ka me bollëk, por kundërshton faktin që atë e mbledhin edhe shtetas të huaj nga Shqipëria dhe Kosova. Ai shprehet se vendasit paguajnë dhe duhet të pajisen me leje për të mbledhur të qetë, ndërsa ankohet se të ardhurit nuk dënohen, ndryshe nga fshatarët që ndëshkohen nëse presin ndonjë dru. Duke ritheksuar se prodhimi është i bollshëm, ai shton se çmimi arrin në 500 denarë për kilogram, por puna e mbledhjes nuk është e lehtë.

Parku Kombëtar njofton se këtë vit, për herë të parë, do të zbatohet një rregullore e re. Banorët që jetojnë në zonën e parkut kombëtar përjashtohen nga pagesa, kurse personat që vijnë nga jashtë territorit të tij duhet të paguajnë 2.000 denarë në vit. Për kompanitë është përcaktuar një tarifë prej 50.000 denarësh, së cilës i shtohen edhe 5 denarë për çdo kilogram të mbledhur.

Drejtori i Parkut Kombëtar “Mali Sharr”, Evzal Elmazi, sqaron se të gjithë banorët lokalë që jetojnë në vendbanimet e lidhura me territorin e parkut kanë të drejtë të mbledhin produkte bimore pa kryer asnjë pagesë. Në rast se ata bashkëpunojnë ose nënshkruajnë marrëveshje me ndonjë nga qendrat grumbulluese, subjekti përkatës duhet t’i dorëzojë parkut listën e personave të angazhuar, bazuar në kontratat e lidhura mes tyre. Më pas, për këta mbledhës do të përgatiten leje të posaçme. Elmazi shton se personat që, sipas adresës në letërnjoftim, banojnë jashtë vendbanimeve të parkut, duhet të paguajnë një leje me tarifë prej 500 denarësh.

Boronica vlerësohet si një frut pyjor me veti të shumta shëndetësore. Ajo gjen përdorim të gjerë në prodhimin e artikujve ushqimorë, si dhe në industrinë farmaceutike, kozmetikë dhe detergjente. Gjatë këtij viti, katër kompani kanë kërkuar leje për të lidhur kontratë me Parkun Kombëtar “Mali Sharr”. /tv21