Prokuroria kërkon paraburgim për katër të dyshuar pas të shtënave në një dasmë në Dobërdoll

Prokuroria Themelore Publike në Gostivar ka hapur procedurë ndaj katër banorëve të fshatit Dobërdoll, në Komunën e Vrapçishtit, pas kallëzimit penal të paraqitur nga Ministria e Punëve të Brendshme. Ata dyshohen se kanë konsumuar veprën penale “Shkaktim i rrezikut të përgjithshëm”, të parashikuar nga neni 288, paragrafi 3, në lidhje me paragrafin 1 të Kodit Penal.

Prokuroria bën të ditur se ngjarja ka ndodhur në mbrëmjen e 31 korrikut, gjatë një ahengu familjar të organizuar në oborrin e një shtëpie në fshat. Të dyshuarit pretendohet se kanë qëlluar në ajër me tre pistoleta dhe një pushkë, marka dhe kalibri i së cilës nuk dihen.

Si pasojë e përdorimit të armëve të zjarrit, është vënë në rrezik jeta e shumë personave që merrnin pjesë në dasmë.

Për shkak të rrethanave që sinjalizojnë mundësi arratisjeje për secilin prej tyre, prokurori publik i ka kërkuar gjykatësit të procedurës paraprake në Gostivar që të caktojë masën e paraburgimit ndaj të katër të dyshuarve. Njëri prej tyre, krahas shtetësisë së Maqedonisë së Veriut, ka edhe shtetësi sllovene.