Prangoset ndihmësdrejtori i Doganave të Maqedonisë së Veriut

Policia ka arrestuar Xhever Imerin, ndihmësdrejtor i Sektorit për Administratë në Drejtorinë e Doganave, pasi u kap në flagrancë duke pranuar mbi 15 mijë euro ryshfet në lidhje me një tender publik.

Të dhënat bëjnë të ditur se Ministria e Punëve të Brendshme, nëpërmjet Byrosë për Siguri Publike, kishte përgatitur para të shënuara, të cilat iu dhanë të dyshuarit gjatë një operacioni të organizuar paraprakisht.

Menjëherë pas marrjes së shumës, Imeri nuk iu bind urdhrave të policisë dhe u përpoq të arratisej me shpejtësi. Forcat e rendit reaguan menjëherë, duke e ndaluar dhe arrestuar atë.

MPB-ja deklaroi se operacioni dëshmon angazhimin e pakompromis në luftën kundër krimit dhe korrupsionit. Ministria theksoi gjithashtu se ligji do të zbatohet në mënyrë të barabartë ndaj të gjithëve, pavarësisht funksionit apo pozitës që mbajnë./news24live