Policët serbë do të patrullojnë në Ohër deri më 31 gusht

Nga nesër e deri më 31 gusht, në Ohër do të ketë patrullime të përbashkëta mes policëve serbë dhe efektivëve të policisë së RMV-së, në kuadër të angazhimeve të përbashkëta për sezonin veror turistik.

Lajmi është bërë i ditur nga SPB Ohër, pas zhvillimit të një takimi pune me Ministrinë e Brendshme të Maqedonisë dhe përfaqësues të policisë nga Ministria e Brendshme e Republikës së Serbisë.

Në deklaratë theksohet se patrullat e përziera synojnë të shtojnë sigurinë si për qytetarët, ashtu edhe për turistët serbë, të cilët i kalojnë pushimet e tyre vjetore në Ohër në numër të madh. Sipas njoftimit, gjatë këtyre patrullimeve, oficerët e policisë serbe do të zbatojnë legjislacionin kombëtar të Republikës së Maqedonisë, nuk do të jenë të armatosur dhe do të ofrojnë mbështetje për policët maqedonas. Po ashtu, para nisjes zyrtare të detyrës nesër, ata janë njoftuar me dispozitat e ligjeve maqedonase për punët e brendshme dhe për policinë.