Përfundon ristrukturimi i kabinetit qeveritar, Zulfiqar Zejnulla merr postin e ministrit pa resor

Kryeministri Hristijan Mickoski finalizoi sot procesin e paralajmëruar të ristrukturimit të ekzekutivit. Parlamenti miratoi emërimin e Zulfiqar Zejnullës, lider i Partisë Demokratike të Turqve, në detyrën e ministrit pa resor.

Ky emërim erdhi si rezultat i marrëveshjes së koalicionit mes Partisë Demokratike të Turqve dhe VMRO-DPMNE-së. Në kuadër të kësaj marrëveshjeje, deputeti Bejxhan Iljas, i cili ishte zgjedhur nga radhët e Frontit Evropian të udhëhequr nga BDI, kaloi në kampin e shumicës parlamentare. Tani, shumica e drejtuar nga VMRO-DPMNE ka 59 deputetë, pa llogaritur partnerët e tjerë të koalicionit qeverisës, VLEN dhe ZNAM.

Votimi për Zejnullën u krye në mënyrë të ndarë nga emërimi i ministrave të tjerë të rinj, për të respektuar rregullin kushtetues që lejon kryeministrin të ndryshojë jo më shumë se një të tretën e anëtarëve të kabinetit pa u konsideruar si qeveri e re. Në rast të kundërt, procedura do të trajtohej si zgjedhje e një qeverie tjetër.

Duke mbrojtur propozimin e tij përpara ligjvënësve, Mickoski theksoi rëndësinë e drejtimit të institucioneve nga individë të përgjegjshëm, të cilët angazhohen për zgjidhjen e shqetësimeve qytetare, duke shtuar se vendi ka nevojë për një politikë që bashkon, jo që përçar.

Nga ana tjetër, opozita kritikoi emërimin, duke e cilësuar si një marrëveshje tjetër politike dhe duke argumentuar se më shumë se përkatësia etnike, rëndësi ka vizioni dhe aftësitë e kandidatit për të kryer detyrën.

Sipas biografisë së tij zyrtare, Zejnulla ka një karrierë në administratën shtetërore dhe fushën e sigurisë. Nga viti 2021 deri në 2024, ai shërbeu si zëvendësdrejtor në Drejtorinë për Mbrojtje dhe Shpëtim. Më parë, ka qenë këshilltar komunal në Gostivar dhe ka punuar në departamentin ligjor të Partisë Demokratike të Turqve, si dhe ka pasur përvojë në sektorin privat.

Ai është diplomuar në Kriminalistikë nga Fakulteti i Sigurisë në Universitetin “Shën Klimenti i Ohrit” në Manastir. Përveç gjuhës së tij amtare, turqishtes, ai flet edhe maqedonisht, shqip, gjermanisht dhe serbisht.