Pensionistët kërkojnë që rritja e pensioneve të jetë lineare dhe e njëjtë për të gjithë

Pas dy vitesh zbatimi të rritjeve lineare, nga shtatori harmonizimi i pensioneve është rikthyer te modeli përqindësor, i lidhur me ndryshimin e pagave dhe koston e jetesës. Kryeministri Hristijan Mickoski ka bërë të ditur se në shtator do të zbatohet mekanizmi i përcaktuar me ligj, ndërsa përqindja përfundimtare e rritjes ende nuk është llogaritur.

Pensionistët do t’i kërkojnë ministrit për politikë sociale, demografi dhe të rinj, Gjoko Velkovski, që rritjet e ardhshme të përcaktohen me ligj dhe të jenë të barabarta për të gjithë, përmes një shume fikse në denarë.

Iniciativa për rritje lineare vlerëson se sistemi aktual, i bazuar në përqindje, thellon diferencat mes pensionistëve. Sipas tyre, aplikimi i së njëjtës përqindje u sjell përfitim më të madh në shifra atyre që marrin pensione më të larta, ndaj fondet buxhetore duhet të shpërndahen në mënyrë të barabartë.

“Parametrat kryesorë për formimin e pensionit – si stazhi i punës, shkollimi dhe vendi i punës – janë të përfshirë në vendimin për pensionin. Por pas daljes në pension, të gjithë kemi të njëjtat shpenzime të jetesës. Të gjithë pensionistët jemi të barabartë”, deklaroi Kiril Josifovski, kryetar i Iniciativës së pensionistëve nga Ohri dhe Debarca.

Trajçe Stanojkov nga Sveti Nikole tha se zbatimi i përqindjes nuk prodhon të njëjtin efekt për pensionistët me të ardhura të ndryshme.

“Nuk mundet 3 për qind t’i jepet atij që ka 90 mijë denarë pension dhe të marrë 3.000 denarë, ndërsa ai që ka 18 ose 20 mijë denarë pension të marrë vetëm 600 denarë.”

Kërkesa e pensionistëve është që rritja lineare të përfshihet në ligj dhe të nisë të zbatohet me harmonizimin e marsit të ardhshëm. Ata kërkuan gjithashtu largimin nga detyra të kryetares së Shoqatës së Pensionistëve të Maqedonisë, Stanka Trajkovska, për shkak të qëndrimit të saj kundër modelit linear.