Osmani: Bërvenica iu përgjigj politikave anti-shqiptare, VLEN-i krijoi paqartësi pas fitores së Jahijut

Bujar Osmani, nënkryetar i Bashkimit Demokratik për Integrim (BDI), e interpretoi angazhimin e jashtëzakonshëm të mërgatës dhe bashkimin e qytetarëve në Bërvenicë si një kundërpërgjigje të qartë ndaj politikave të OBRM-PDUKM-së dhe Qeverisë, të cilat ai i konsideron anti-shqiptare dhe anti-europiane.

Në një prononcim për “Shenja”, ai tha se ky mobilizim dëshmon se qytetarët kanë nisur t’u përgjigjen këtyre politikave. Sipas Osmanit, reagimi i tyre përcjell paralajmërimin se një qasje e tillë nuk mund të vazhdojë për një kohë të gjatë.

Ai u shpreh se, ndonëse me këto politika mund të kalohet një periudhë e caktuar, të fitohet ndonjë betejë zgjedhore apo të qëndrohet më pak ose më shumë në Qeveri, epoka e politikave anti-shqiptare në Maqedoni është mbyllur në vitin 2001.

Osmani komentoi edhe qëndrimet e drejtuesve të VLEN-it pas fitores së kandidatit shqiptar, Arkin Jahijut. Ai i kritikoi për mungesën e një thirrjeje të qartë në mbështetje të tij përgjatë procesit zgjedhor dhe vlerësoi se deklaratat e tyre kishin prodhuar konfuzion.

Ndërkohë, si gjest pozitiv ai përmendi vizitën që kundërkandidati i Arkin Jahiut, të cilin e quajti kandidatin e tyre, bëri natën në shtabin e BDI-së për të përshëndetur fituesin. Sipas tij, paqartësia në qëndrimet e udhëheqësve të VLEN-it erdhi pas këtij veprimi.

Duke argumentuar kritikat e tij, Osmani tha se ata nuk kërkuan në asnjë moment mbështetje për kandidatin shqiptar në Bërvenicë, por u shprehën që të fitonte më i miri ose që etika të mos ngatërrohej me etnikën.

Kumtesën e sotme të VLEN-it, ku thuhet se shoqëria ende nuk ka arritur të ndërtojë një model multietnik, Osmani e quajti skandaloze. Ai e interpretoi këtë deklaratë sikur VLEN-i po u kërkonte falje shqiptarëve ose qytetarëve për faktin që zgjedhjet i kishte fituar kandidati shqiptar.