Operacioni “Vardaris” sekuestron mbi 324 kilogramë marihuanë në Selanik, arrestohen shtetas nga Maqedonia e Veriut dhe Kosova

Një shtetas nga Maqedonia e Veriut është vënë nën hetim dhe është lënë në paraburgim, pasi dyshohet se ishte përfshirë në transportin e më shumë se 324 kilogramëve marihuanë të sekuestruar në Selanik të Greqisë. Lajmi u bë i ditur sot nga Prokuroria Publike e Republikës së Maqedonisë së Veriut.

Sipas Prokurorisë, në fund të shkurtit të këtij viti i dyshuari siguroi një automjet transporti, ndërsa në fillim të marsit mori edhe një rimorkio. Më pas, ai organizoi transportin e dyshuar të letrës së ricikluar të presuar nga Republika e Maqedonisë së Veriut drejt Republikës së Turqisë, përmes Republikës së Bullgarisë.

Pas përfundimit të procedurave doganore, më 8 mars 2026, i dyshuari u largua nga territori i Maqedonisë me automjetin dhe rimorkion, në drejtim të Republikës së Bullgarisë. Megjithatë, në vend që të vijonte udhëtimin drejt Turqisë, ai u nis për në Greqi dhe e la automjetin me rimorkio në një ambient të mbyllur me qira në Selanik.

Gjatë qëndrimit atje, ai u takua me dy persona të dyshuar, ndaj të cilëve po zhvillohet procedurë në Republikën e Greqisë. Njëri prej tyre rezulton i paarritshëm për organet e ndjekjes. Sipas njoftimit, në këtë takim i dyshuari mësoi për planin e transportit të mëtejshëm të lëndës narkotike, e cila do të fshihej në ngarkesën me letër të ricikluar.

Pasi droga u sigurua, dy nga të dyshuarit, së bashku me persona të tjerë ende të paidentifikuar, e vendosën marihuanën në hapësirat e përgatitura më herët brenda balotave me letër të ricikluar. Ky proces u krye gjatë periudhës 11-14 gusht 2026.

Më 14 gusht 2026, në kuadër të operacionit “Vardaris”, policia greke arrestoi dy prej të dyshuarve dhe kontrolloi ambientin e marrë me qira. Brenda tij u gjet rimorkioja, së cilës i ishin hequr më parë targat e regjistrimit. Sasia e drogës u zbulua në katër paleta të vendosura në pjesën e pasme të rimorkios dhe në katër paleta të tjera të pozicionuara përpara saj.

Në kuadër të të njëjtit aksion është arrestuar edhe një shtetas i Kosovës.

Operacioni u zhvillua pas një hetimi disa-mujor dhe falë bashkëpunimit mes autoriteteve të Maqedonisë së Veriut, Greqisë dhe Kosovës.