Nga Nju Jorku në Dibër e më pas në Tiranë, Rrape Ruci i bashkohet protestës masive

Në Tiranë po zhvillohet dita e 22-të e protestës jopartiake.

Si edhe në ditët e tjera, qytetarët janë mbledhur në sheshin ‘Skënderbej’ dhe më pas kanë marshuar në drejtim të Kryeministrisë.

Gjatë lëvizjes së tyre, ata kanë kaluar pranë ‘Fan Zone’, teksa thërrisnin: Bashkohuni me ne!

Në mesin e dhjetëra mijëra protestuesve ndodhet edhe veprimtari dhe patrioti dibran, Rrape Ruci, i cili ka udhëtuar nga Nju Jorku në Dibër dhe nga Dibra në Tiranë për të protestuar kundër qeverisë.

I mbështjellë me flamurin kuq e zi, njësoj si në periudhat e vështira kur ka protestuar për çështjen shqiptare në Nju Jork, Uashington dhe vende të tjera, Rrape Ruci edhe kësaj here i është përgjigjur pa hezitim thirrjes së mëmëdheut me respekt të plotë.

Tashmë qytetarët janë vendosur përpara Kryeministrisë, ku po mbajnë fjalime përpara marshimit në rrugët e Tiranës.

Ndërsa ndodheshin para Kryeministrisë, mes qytetarëve pati përplasje lidhur me atë se kush do ta mbante i pari fjalimin, çka bëri që një prej folësve me megafon të kërkonte qetësi dhe t’u bënte thirrje protestuesve të ruanin bashkimin.