Ndryshojnë çmimet e derivateve të naftës

Çmimet me pakicë të derivateve të naftës do të ulen mesatarisht me 2,06% në raport me përllogaritjen e kaluar, sipas vendimit të Komisionit Rregullator për Energjetikë, Shërbime të Ujit dhe Shërbime të Menaxhimit të Mbetjeve Komunale (KRRE).

Tarifat e reja do të hyjnë në fuqi më 1 shtator, në orën 00:01. Dizeli dhe vaji ekstra i lehtë për amvisëri do të shiten dukshëm më lirë, ndërsa benzina do të pësojë shtrenjtim.

Çmimi i EURODIZELIT (D-E V) zvogëlohet për 6,50 denarë për litër dhe do të jetë 95,00 denarë për litër.

Vaji ekstra i lehtë për amvisëri (EL-1) do të kushtojë 97,00 denarë për litër, pas uljes prej 3,50 denarësh për litër.

EUROSUPER BS-95 shtrenjtohet për 1,00 denar për litër, duke e çuar çmimin në 94,00 denarë për litër.

Edhe EUROSUPER BS-98 pëson rritje prej 1,00 denari për litër dhe çmimi i ri do të jetë 96,00 denarë për litër.

Për mazutin M-1 NS është vendosur ulje prej 1,166 denarësh për kilogram, ndaj ai do të shitet me 44,410 denarë për kilogram.

KRRE njofton se në tregun botëror çmimet referente të benzinave janë rritur me 2,212%. Ndërkohë, te dizeli është regjistruar rënie prej 8,237%, te vaji ekstra i lehtë prej 4,389% dhe te mazuti prej 2,793%. Kursi i denarit kundrejt dollarit amerikan është zvogëluar me 0,5477%.

Komisioni sqaron se bëhet fjalë për çmime maksimale të përcaktuara. Shitësit me shumicë dhe pakicë mund t’i tregtojnë derivatet me çmime më të ulëta se kufijtë e vendosur.