Nano Ruzhin: Publikimi i notës diplomatike për familjen e Mickoskit është rast i pazakontë që dëmton fqinjësinë e mirë

Ish-ambasadori dhe diplomati Nano Ruzhin vlerëson se është e pamundur të thuhet me saktësi se kush e publikoi dhe ku doli nota diplomatike, pasi sipas tij dokumenti origjinal me gjasë është dorëzuar në Ministri, ndërsa më pas humbet çdo gjurmë, aq më tepër kur Ministria e Jashtme e Bullgarisë mohon se materiali ka dalë prej saj.

Sipas Ruzhinit, mund të bëhet fjalë për një incident të thjeshtë ose për një keqkuptim në komunikim. Ai nënvizon se kjo ngjarje duhet të shërbejë si një tjetër sinjal se nevojitet më shumë kujdes ndaj episodeve të tilla të pakëndshme, sepse nota diplomatike është një dokument i klasifikuar dhe rreptësisht konfidencial.

Ai thekson se situata do të ishte krejt ndryshe nëse një turist i rastësishëm do t’i shihte diku në plazh, në mal apo në hotel personat për të cilët bëhet fjalë dhe do t’i fotografonte, por një notë e tillë, si dokument, duhet të mbetet sekrete. Duke komentuar detajet e zbuluara nga udhëtimi i familjes së Kryeministrit në qendrën bullgare të skive “Pamporovo”, Ruzhin vlerëson se bëhet fjalë për një incident të pazakontë që nuk i shërben fqinjësisë së mirë mes dy vendeve./Telegrafi/