MSH-Maqedoni: Rasti i nënës së re që nuk mundi t’i nënshtrohej prerjes cezariane do të hetohet deri në fund

Ministria e Shëndetësisë së Maqedonisë së Veriut ka njoftuar se rasti i pacientes, i cili ditët e fundit ka tërhequr vëmendjen e opinionit publik, po i nënshtrohet një hetimi të plotë. Me urdhër të ministrit, Inspektorati Shtetëror Sanitar dhe Shëndetësor (ISHSSH) ka nisur mbikëqyrje të jashtëzakonshme inspektuese në të tria institucionet ku është trajtuar pacientja: ISHP Spitali i Përgjithshëm Strumicë, ISHP Spitali Klinik Shtip dhe ISHP Klinika Universitare e Neurologjisë – Shkup.

Sipas MSH-së, gjatë ditëve në vijim pritet përfundimi i mbikëqyrjeve dhe sigurimi i dokumentacionit të plotë mjekësor nga të gjitha institucionet shëndetësore të përfshira. Pas shqyrtimit të tërësishëm të gjendjes faktike, do të nxirren përfundimet e mbikëqyrjes profesionale dhe, nëse do të jetë e nevojshme, do të ndërmerren edhe hapa të tjerë.

Ministria nënvizon se e drejta e pacientes për dinjitet, privatësi dhe mbrojtjen e të dhënave personale e mjekësore duhet të respektohet gjatë gjithë procesit. Çdo pacient gëzon të drejtën ligjore për shërbim shëndetësor të sigurt, cilësor dhe në kohë, si dhe për të marrë informacion të plotë e të kuptueshëm lidhur me gjendjen e tij shëndetësore. Këto të drejta, sipas MSH-së, do të garantohen si gjatë inspektimit, ashtu edhe në komunikimin e mëtejshëm me pacienten dhe familjen e saj.

MSH-ja siguron se rasti do të analizohet në mënyrë të plotë, profesionale dhe deri në fund, pa lënë jashtë shqyrtimit asnjë element. Nëse evidentohen lëshime, do të merren masat përkatëse, në përputhje me kompetencat dhe dispozitat ligjore në fuqi. Ministria i kërkon opinionit të presë përfundimin e procedurave, duke shmangur përfundimet e parakohshme, përhapjen e spekulimeve dhe publikimin e të dhënave personale që mund të rëndojnë më tej situatën e pacientes dhe familjes së saj.

Njëkohësisht, ministria u bën apel opinionit dhe mediave që të tregojnë korrektësi dhe të respektojnë dinjitetin e punonjësve shëndetësorë të përfshirë në rast. Çdo përgjegjësi e mundshme e tyre do të përcaktohet vetëm mbi bazën e rezultateve të mbikëqyrjes profesionale dhe jo përmes gjykimit publik para përfundimit të procedurave.

Pas mbylljes së mbikëqyrjeve dhe analizimit të të gjitha konstatimeve, Ministria e Shëndetësisë deklaron se do ta informojë opinionin në kohë dhe në mënyrë transparente për faktet e përcaktuara dhe hapat që do të ndërmerren, thuhet në njoftim./Telegrafi/