MPB evidenton 6.932 shkelje nga drejtuesit e mjeteve me dy dhe katër rrota, 503 kallëzime penale

Kontrollet e shtuara të zhvilluara në të gjithë territorin e Maqedonisë së Veriut nga 18.05.2026 deri më 31.07.2026 kanë qenë të përqendruara te drejtuesit e biçikletave me motor ndihmës, mopedëve, motoçikletave, triçikleve dhe katërçikleve. Aksionet u realizuan nga Sektori për Çështjet e Trafikut pranë Ministrisë së Punëve të Brendshme.

Gjatë këtyre kontrolleve u regjistruan 6.932 kundërvajtje të kryera nga drejtuesit e këtyre kategorive të mjeteve, ndërsa drejtuesit e biçikletave u konstatuan përgjegjës për 33 kundërvajtje të tjera.

Sipas të dhënave të MPB-së, numri më i lartë i shkeljeve u evidentua nga SPB Shkup me 2.146 raste. Pas tij renditen SPB Manastir me 992, SPB Veles me 856, SPB Kumanovë me 583, SPB Shtip me 544, SPB Tetovë me 541, SPB Ohër me 420 dhe SPB Strumicë me 327 kundërvajtje. Njësiti Mobil për Sigurinë e Trafikut Rrugor ka konstatuar 556 raste.

Nga totali i shkeljeve të regjistruara, 5.678 lidhen me drejtimin e këtyre mjeteve pa përdorur helmetën mbrojtëse.

Për çdo kundërvajtje janë marrë masat e parashikuara nga Ligji për Sigurinë e Trafikut Rrugor. Përveç tyre, gjatë kontrolleve u evidentuan edhe 15.715 kundërvajtje të tjera. Ndaj 503 drejtuesve u dorëzuan kallëzime penale, në bazë të nenit 297-a të Kodit Penal.

MPB-ja njofton se kontrollet e përforcuara do të vijojnë në të gjithë vendin, me synim rritjen e sigurisë në trafik dhe zbatimin e rregullave rrugore. Institucioni u kërkon drejtuesve të biçikletave, biçikletave me motor ndihmës, mopedëve, motoçikletave, triçikleve, katërçikleve dhe mjeteve të lehta elektrike të tregohen të përgjegjshëm, të respektojnë rregulloret, të mbajnë detyrimisht helmetën mbrojtëse dhe të mos drejtojnë nën ndikimin e alkoolit apo substancave të tjera psikoaktive.