Mitreski: Optimizimi në arsim nuk duhet të rëndojë mbi mësuesit, ndërsa Qeveria ruan privilegjet e saj

Gjatë debatit parlamentar për ndryshimet në ligjet që lidhen me arsimin fillor dhe të mesëm, deputeti i LSDM-së, Jovan Mitreski, deklaroi se optimizimi i paralajmëruar në sektorin e arsimit nuk guxon të bëhet në dëm të mësuesve.

Sipas tij, mijëra arsimtarë po jetojnë me pasiguri për vendet e punës, në një kohë kur Qeveria, siç tha ai, nuk shfaq vullnet për të shkurtuar shpenzimet, lukset dhe privilegjet e veta.

Mitreski theksoi se, nëse me të vërtetë kërkohet optimizim, atëherë ai duhet të nisë nga institucionet dhe jo nga njerëzit që edukojnë dhe formësojnë brezat e ardhshëm të vendit.

“Nuk mund ta besoj me sa lehtë po kalojmë një temë që ka të bëjë me disa njerëz që ndoshta dikush mendon se nuk janë shumë të rëndësishëm, por në fakt janë më të rëndësishmit në shoqëri dhe në vendin tonë. Po flasim për mësuesit dhe profesorët, puna e të cilëve nuk është thjesht një profesion. Ajo që bëjnë ata nuk është vetëm një zanat. Ata edukojnë, formojnë, frymëzojnë dhe ndërtojnë një të ardhme. Ndërsa ne sot do t’i miratojmë këto dy ligje në një sallë gjysmë të zbrazët.

Po diskutojmë për të ardhmen e tyre dhe po i kalojmë kaq lehtë ata, për shkak të diçkaje që ndodhi, nuk e di se kur ndodhi. Sot po flasim për pasojat e një problemi që vjen nga e kaluara. Nëse sot themi se numri i qytetarëve tanë po bie, se popullsia po zvogëlohet dhe po pakësohet edhe numri i nxënësve, atëherë a duhet të themi se fajin e kanë mësuesit? Se profesorët janë fajtorë dhe duhet t’i ndjekim ata? Jo, së pari duhet të themi se fajin e kemi ne. Ne që jemi ulur këtu, ne mbajmë përgjegjësi për faktin që popullsia po zvogëlohet dhe numri i nxënësve po bie”, tha Mitreski.