Ministria e Ekonomisë përjashton masa të reja: Çmimet e ushqimeve bien për të dytin muaj radhazi

Ministria e Ekonomisë dhe Punës vlerëson se, në rrethanat aktuale, nuk është e nevojshme të vendosen masa të tjera për kufizimin e çmimeve të ushqimeve. Ky qëndrim vjen pasi Enti Shtetëror i Statistikës njoftoi se inflacioni vjetor në korrik ishte 2,3 për qind, ndërsa ai mujor 0,1 për qind.

Sipas dikasterit, të dhënat zyrtare tregojnë se çmimet po lëvizin në mënyrë të qëndrueshme. Në kategorinë e ushqimeve, ndërkaq, është evidentuar rënie për të dytin muaj radhazi.

“Për momentin, treguesit zyrtarë nuk sinjalizojnë nevojën për vendosjen e masave të reja intervenuese, pasi lëvizjet e çmimeve janë stabile, ndërsa në kategorinë më të rëndësishme – ushqimet – tashmë për të dytin muaj radhazi shënohet ulje e çmimeve”, njoftuan nga Ministria.

Rritja e kostos së jetesës gjatë korrikut, sipas Ministrisë, lidhet kryesisht me ndikimet sezonale. Kjo është vërejtur veçanërisht në transport, ku u regjistrua një rritje prej 4,4 për qind, si dhe në kategorinë e rekreacionit, sportit dhe kulturës.

Ministria bëri të ditur se zhvillimet në treg po monitorohen me vëmendje dhe se masat përkatëse do të ndërmerren nëse shfaqen rritje të pajustifikuara të çmimeve ose çrregullime të tregut.

Ministrja e Financave, Gordana Dimitrieska-Koçoska, e cilësoi vazhdimin e prirjes rënëse të inflacionit si një sinjal pozitiv për ekonominë. Ajo theksoi gjithashtu se rritje po regjistrohet te eksportet, prodhimi industrial, punësimi dhe të ardhurat tatimore në Buxhet.