Mickoski: Prokuroria po heton për të përcaktuar përgjegjësit për ndotjen e ujit në Gostivar

Kryeministri i RMV-së, Hristijan Mickoski, deklaroi se personat përgjegjës për situatën me ujin në Gostivar po këshillohen me ekspertë. Sipas tij, uji aktualisht mund të shfrytëzohet për nevoja teknike, ndërsa pritet që së shpejti të jetë i përshtatshëm edhe për pije. Ai u bëri thirrje palëve që të mos përhapin histeri.

Në një intervistë për podkastin “Rishtazi në ‘Koha’”, Mickoski nënvizoi se shërbimet në fjalë janë ekskluzivisht në kompetencë të komunës, e cila ka një mënyrë të përcaktuar komunikimi me institucionet shtetërore për çështjet që lidhen me inspektimet dhe procedura të ngjashme.

“Të gjithë duhet ta kemi të qartë se kjo është një përgjegjësi që i takon komunës dhe kjo është shumë e rëndësishme të thuhet, sepse ato shërbime janë ekskluzivisht përgjegjësi e komunës. Ekziston një mënyrë se si komuna komunikon me institucionet shtetërore në aspektin e inspektimeve dhe të ngjashme. Sa i përket Gostivarit, që nga sot ka ujë teknik, në ditët e fundit parametrat kanë qenë pozitivë kur them se instalimet janë pastruar, domethënë janë hiperkloruar, dhe sot qytetarët tashmë mund ta përdorin atë për përdorim teknik, jo për pije dhe gatim”, tha Mickoski.

Ai bëri të ditur se hiperklorimi pritet të vijojë edhe gjatë ditëve të ardhshme. Sipas parashikimeve, në gjysmën e dytë të kësaj jave, i njëjti ujë mund të jetë i përdorshëm si për t’u pirë, ashtu edhe për përgatitjen e ushqimit.

Duke folur për përgjegjësinë, kryeministri sqaroi se drejtori i ndërmarrjes publike përkatëse nuk është emëruar nga Qeveria, por nga qendra të tjera, në këtë rast nga kryetari i Komunës. Ai shtoi se prokuroria po kryen detyrën e saj për të zbuluar se kujt i takon përgjegjësia.

“Nëse sillesh në mënyrë të papërgjegjshme në atë mënyrë, kjo është diçka që të paktën mund të pritet që një person që është emëruar për të udhëhequr atë institucion do të sillet në mënyrën që u sollën disa njerëz atje, jo një person. Nuk mund të marrësh një vendim dhe ta zbatosh atë vendim i vetëm pa marrë një urdhër ose pa kërkuar ndihmë nga njerëz të caktuar për logjistikë. Në këtë rast, kemi sjellje të pamatur njerëzore”, deklaroi Mickoski.

Kryeministri tha gjithashtu se pranë ekipit të tij ndodhen ekspertë, me të cilët zhvillohen konsultime për situatën dhe këshillat e të cilëve merren parasysh. Ai vuri në dukje se reagimi për sigurimin e ujit të pijshëm ishte i shpejtë, ndërsa falënderoi qytetarët dhe kompanitë që dhuruan ujë, si dhe të gjithë ata që treguan durim.

“Faleminderit edhe Qytetit të Shkupit dhe Ndërmarrjes Publike ‘Ujësjellësi’, e cila me ekipin e saj mori pjesë në hiperklorinimin për të siguruar ujë teknik, dhe për të gjithë ata që kanë qenë të duruar. Shpresoj që raste të tilla të mos ndodhin në të ardhmen, prokuroria po bën punën e saj, tani do të shohim se kush është përgjegjës”, shtoi Mickoski.