Mickoski: Po përgatisim masa për prodhuesit vendas të qumështit dhe rregulla më të forta për importin

Kryeministri Hristijan Mickoski bëri të ditur sot, në përgjigje të një pyetjeje të një gazetari nëse Qeveria po planifikon ndihmë për këtë sektor, se ekzekutivi tashmë është duke punuar për ndryshime në rregulloren që lidhet me importin e qumështit pluhur dhe vajit të palmës. Ai tha se, njëkohësisht, po hartohen edhe masa për uljen e rezervave në fabrikat e qumështit, si dhe për mbështetjen e prodhuesve vendas të qumështit.

Sipas Mickoskit, vështirësitë me të cilat po përballet aktualisht industria e qumështit lidhen me ndryshimet e mëhershme në rregullore, të cilat, sipas tij, i lehtësuan kushtet për import.

“Por fillimisht duhet të gjejmë fajtorin, domethënë të diagnostikojmë problemin. Ndërsa problemi u krijua disa vite më parë nga qeveria e mëparshme, me ndryshimet në rregullore, të cilat ulën kriteret për importin e qumështit pluhur dhe vajit të palmës. Ky është thelbi. Nga këtu vjen ajo që po ndodh sot”, tha kryeministri.

Ai nënvizoi se fabrikat e qumështit aktualisht disponojnë rezerva të mëdha, gjë që, sipas tij, ndikon drejtpërdrejt si në sasinë e qumështit të papërpunuar që blihet nga fermerët, ashtu edhe në çmimet e blerjes.

“Qumështoret kanë depo të mbushura me produkte të prodhuara nga qumështi i përpunuar. Kjo reflektohet në vëllimin e blerjeve të qumështit nga fermerët dhe, natyrisht, ndikon në çmimin, i cili është në rënie”, theksoi Mickoski.

Mickoski shtoi se kjo gjendje nuk është veçori vetëm e vendit, por po haset edhe në shtetet e rajonit. Ai paralajmëroi se, në kuadër të masave që po përgatiten, Qeveria po punon për të vendosur kritere më të ashpra për importin e qumështit pluhur dhe për operatorët ekonomikë që e sjellin atë, duke vënë në plan të parë mbrojtjen e prodhuesve vendas.

“Rregullorja e re fut kritere më të rrepta në lidhje me qumështin pluhur dhe operatorët ekonomikë që e importojnë atë. Në periudhën që vjen, interesi ynë kryesor janë fermerët vendas, pra prodhuesit e qumështit nga vendi ynë”, theksoi kryeministri.

Ai njoftoi gjithashtu se po zhvillohen aktivitete për të nxitur marrëveshje ndërmjet prodhuesve dhe përpunuesve të qumështit, si edhe për të siguruar mjete nga kompani me përgjegjësi shoqërore, me qëllim blerjen e produkteve të tepërta që ndodhen në depot e qumështoreve.

Në të njëjtën kohë, Mickoski rikujtoi se pas përfundimit të ribalancimit të Buxhetit do të realizohet pagesa e subvencioneve për vitin 2025. Ai theksoi se Qeveria po punon për të kapërcyer gjendjet e trashëguara nga periudha e kaluar.

“Natyrisht, pas përfundimit të ribalancimit të Buxhetit, do të paguhen edhe subvencionet për vitin 2025. Vetëm për kujtesë, në vitin 2024, subvencionet për vitin 2023 nuk u paguan kur morëm pushtetin. Tani po flasim për subvencione që do të paguhen për vitin 2025, që do të thotë se procesi është në vazhdim”, theksoi Mickoski.