Mickoski paralajmëron nisjen e punimeve në autostradën Shkup-Bllacë më 26 gusht

Pjesa e dytë e autostradës Shkup-Bllacë pritet të hyjë në fazën e ndërtimit në fund të këtij muaji, bëri të ditur kryeministri Hristijan Mickoski.

Sipas tij, punimet janë parashikuar të nisin më 26 gusht, pasi tashmë janë plotësuar të gjitha kushtet e nevojshme për realizimin e projektit.

Mickoski deklaroi se ndërtimi do të fillojë zyrtarisht gjatë këtij muaji dhe se kanë përfunduar të gjitha formalitetet e procedurat që kanë të bëjnë me pjesën shqiptare të Bllacës-Shkupit. Ai tha se, me sa kujton, nisja është caktuar për 26 gusht, por kërkoi që të mos merret prerazi për këtë datë. Kryeministri shtoi se projekti dhjetëvjeçar, i paralajmëruar prej kohësh, më në fund ka një kontraktor, i cili është kompani vendase, si dhe mbikëqyrje, ndaj vlerësoi se çdo kusht për fillimin e ndërtimit të autostradës është përmbushur.

Ndërkohë, në mbarë Maqedoninë aktualisht po zhvillohen punime në 1200 lokacione, theksoi Mickoski. Ai njoftoi gjithashtu se ndërtimi i segmentit Bukojçan-Kërçovë pritet të nisë në shtator, kurse për autostradën Kërçovë-Ohër paralajmëroi intensifikim të punimeve dhe përfundimin e saj në mënyrë graduale.