Mickoski: Në dy vjet, kjo qeveri e rriti PBV-në më shumë sesa LSDM-ja në gjashtë vjet

Kryeministri Hristijan Mickoski deklaroi në seancën e sotme parlamentare, gjatë pyetjeve të deputetëve, se akuzave të Venko Filipçes për rritjen e borxhit publik u përgjigjet me krahasimin mes kësaj qeverie dhe qeverisë së LSDM-së. Sipas tij, ekzekutivi aktual, me trefish më pak borxh dhe brenda një periudhe trefish më të shkurtër, ka arritur 140 milionë dollarë më shumë PBV në terma nominalë.

Mickoski tha se është në rregull që po zhvillohet fushatë, që po censurohen komentet në rrjetet sociale dhe që, sipas tij, nuk po jepen përgjigje ndaj pyetjeve objektive nga foltorja e partisë, por shtoi se në Kuvend duhet të dëgjohen faktet dhe shifrat reale. Ai u shpreh se, kur flitet për borxhin publik, ekonomistët përreth Filipçes mund të japin përgjigje për rritjen e tij, por në të njëjtën kohë duhet shpjeguar edhe çfarë nënkupton rritja e PBV-së nominale.

“Do të përpiqem t’jua shpjegoj. Koha e LSDM-së, 1 janar 2018 deri më 31 dhjetor 2023, borxhi publik prej 4.78 miliardë eurosh, u rrit në 8.47 miliardë euro ose një shumë neto prej 3.69 miliardë eurosh. Qeveria e OBRM-PDUKM-së që unë drejtoj në dy vjet, siç thoni ju nga 9 miliardë e 619… le të jetë 11 miliardë euro siç thoni ju, kaq janë 1.381, ose 1 miliard e 381 milionë, afërsisht 2.8 – 3 herë më pak se sa keni marrë hua”, theksoi Mickoski.

Ai shtoi se, megjithëse qeveria e LSDM-së kishte në dispozicion një periudhë 6-vjeçare dhe një nivel të lartë borxhi, arriti ta rrisë PBB-në nominale me 4.52 miliardë dollarë. Ndërkaq, sipas tij, kjo qeveri, me trefish më pak borxh, e ka rritur PBV-në nominale me 4.66 miliardë dollarë.