Mickoski: Grubi nuk organizoi festimet pas lirimit nga arresti shtëpiak dhe kërkoi falje

Kryeministri Hristijan Mickoski mbrojti qëndrimin e mbrojtjes së ish-zëvendëskryeministrit Artan Grubi, i cili po gjykohet për abuzime në “Lotarinë Shtetërore”. I pyetur nga gazetarët për festimet me pishtarë dhe fishekzjarre pas lirimit të Grubit nga arresti shtëpiak, Mickoski tha se ish-zëvendëskryeministri nuk kishte organizuar asgjë dhe se kishte kërkuar falje.

“Për atmosferën e ekzaltuar, dje lexova në media një tekst ku i dyshuari dhe familja e tij u kërkonin falje publikut dhe qytetarëve të vendit, nëse ngjarjet kishin shkaktuar trazira apo ankth”, deklaroi ai.

Sipas Mickoskit, Grubi dhe familja e tij nuk kanë qenë organizatorë dhe nuk synojnë të marrin përsipër organizimin e një sjelljeje të tillë të ekzaltuar nga individë të caktuar.

“Mendoj se kjo lidhet me karakterin e disa individëve, të cilët besojnë se përmes një shfaqjeje të tillë po u vijnë në ndihmë bashkëpartiakëve. Por, sipas meje, ata gabojnë, pasi në të kundërt po ua vështirësojnë pozicionin”, tha Mickoski.

Kryeministri shtoi se Grubi nuk ndodhet në të njëjtën pozitë si një qytetar i lirë, pasi nuk posedon pasaportë dhe nuk lejohet të largohet as nga qyteti, as nga vendi./Telegrafi/