Mickoski dhe Brojer diskutojnë thellimin e bashkëpunimit ushtarak mes Maqedonisë së Veriut dhe Gjermanisë

Kryeministri Hristijan Mickoski, i shoqëruar nga ministri i Mbrojtjes Vllado Misajllovski, zhvilloi sot një takim me gjeneralin Karsten Brojer, kryeshef i Shtabit të Përgjithshëm të Forcave të Armatosura të Republikës Federale të Gjermanisë.

Sipas një njoftimi të Mickoskit në profilin e tij në Fejsbuk, bisedimet u përqendruan te avancimi i bashkëpunimit dypalësh në fushën e mbrojtjes, fuqizimi i partneritetit brenda NATO-s dhe çështjet aktuale të sigurisë që prekin Evropën.

“Sot u takuam me kryeshefin e Shtabit të Përgjithshëm të Forcave të Armatosura Gjermane, gjeneralin Karsten Brojer. Biseduam për përparimin e mëtejshëm të bashkëpunimit dypalësh në mbrojtje, forcimin e partneritetit në kuadër të NATO-s, si dhe sfidat aktuale të sigurisë me të cilat përballet Evropa. Së bashku konfirmuam vendosmërinë tonë për thellimin e bashkëpunimit përmes shkëmbimit të përvojave, aktiviteteve të përbashkëta dhe zhvillimit të mëtejshëm të kapaciteteve të forcave të armatosura, me qëllim forcimin e sigurisë rajonale dhe euroatlantike”, thekson Mickoski.

Gjatë vizitës së tij zyrtare dyditore në Armatën dhe Shtetin e Maqedonisë, gjenerali Brojer u takua edhe me kryeshefin e Shtatmadhorisë së Armatës, gjeneralmajorin Sashko Lafçiski, ministrin e Mbrojtjes Vllado Misajllovski dhe presidenten Gordana Siljanovska-Davkova.