MF miraton rregulloren për vlerësimin e reputacionit dhe integritetit të kërkuesve të licencave për lojërat e fatit

Ministria e Financave ka miratuar një rregullore të re që përcakton mënyrën e verifikimit të reputacionit, integritetit dhe prejardhjes së mjeteve të përdorura për organizimin e lojërave të fatit. Ky akt nënligjor buron nga miratimi i Ligjit të ri të Lojërave të Fatit dhe rendit hollësisht dokumentet që duhet të dorëzojnë personat juridikë dhe fizikë kur aplikojnë për licencë për kazino, bastore, klub me automat ose tombolë të llojit të mbyllur.

Për të dëshmuar se i plotësojnë kriteret e reputacionit, aplikantët duhet të paraqesin dokumentacionin përkatës. Ai përfshin, ndër të tjera, të dhëna për sanksione të vendosura që ndalojnë ushtrimin e profesionit, dëshmi se ndaj aplikantëve nuk është shqiptuar masë që ua ndalon organizimin e lojërave të fatit, si dhe informacione për rrethana të tjera të ngjashme me rëndësi për përfshirjen e tyre në këtë veprimtari.

Me rregulloren vendoset gjithashtu mbikëqyrje e rreptë e burimit të mjeteve në kryegjënë themelore. Ministria e Financave, duke shqyrtuar raportet bankare, kontratat dhe bilancet financiare, do të kontrollojë nëse lëvizja e mjeteve financiare mund të ndiqet pa ndërprerje nga origjina e tyre deri te pagesa në shoqëri. Akti rregullon njëkohësisht procedurat për ndryshimin e strukturës së pronësisë dhe të kryegjësë themelore, si edhe për emërimin e anëtarëve të organeve drejtuese dhe mbikëqyrëse.

Miratimi i kësaj rregulloreje lidhet me risitë e Ligjit të ri të Lojërave të Fatit. Një prej tyre është vlerësimi i reputacionit të partnerëve dhe bashkëpunëtorëve të shoqërive që kanë marrë licencë për lojëra të fatit. Vlerësimi përfshin edhe anëtarët e organeve të menaxhimit dhe mbikëqyrjes të shoqërive tregtare që organizojnë lojëra të fatit dhe në të cilat shteti është aksioneri i vetëm. Ky vlerësim konsiderohet faktor shumë i rëndësishëm në luftën kundër pastrimit të parave dhe financimit të terrorizmit, ndaj propozohet që reputacioni i personave të përmendur të shqyrtohet para së gjithash.

Ligji i ri i Lojërave të Fatit u miratua në qershor të këtij viti, me synimin për të ndërtuar një kornizë ligjore moderne, më të qartë dhe më efikase për rregullimin e kësaj fushe.