Maqedonia renditet ndër vendet evropiane me përdorimin më të lartë të duhanit

Të dhënat e Eurostat tregojnë se përdorimi i duhanit dhe produkteve të ngjashme në vendet anëtare të Bashkimit Evropian shënoi rënie gjatë vitit 2025. Në të kundërt, në disa vende të rajonit, përfshirë Serbinë, Kroacinë, Bullgarinë dhe Maqedoninë e Veriut, konsumi i cigareve u rrit ndjeshëm.

Maqedonia vijon të jetë ndër shtetet evropiane me përqindjen më të lartë të përdoruesve të përditshëm të duhanit dhe produkteve të lidhura me të. Në vitin 2022, 22.5% e qytetarëve mbi 16 vjeç konsumonin çdo ditë këto produkte, pra pothuajse një në katër persona.

Kjo shifër është më e ulët se ajo e Turqisë, me 29.6%, Serbisë, me 26.6%, dhe Bullgarisë, me 26.3%. Megjithatë, norma e Maqedonisë mbetet dukshëm mbi mesataren e Bashkimit Evropian, e cila në vitin 2025 ishte 16.5%.

Sipas Eurostat, 16.5% e personave të moshës 16 vjeç e lart në BE përdornin çdo ditë duhan ose produkte të lidhura me të, si cigaret elektronike, qeset e nikotinës dhe produktet e duhanit të ngrohta. Krahasuar me vitin 2022, kur kjo përqindje ishte 17.5%, bëhet fjalë për një ulje të lehtë.

Bullgaria, me 26.3%, Suedia, me 23.9%, dhe Kroacia, me 23.6%, patën nivelet më të larta të përdorimit të përditshëm në mesin e vendeve të BE-së për grupmoshën 16 vjeç e lart. Në anën tjetër, përqindjet më të ulëta u regjistruan në Holandë, me 9.9%, Irlandë, me 11.7%, Belgjikë, me 13.6%, dhe Luksemburg, me 13.8%.

Serbia numëron 26.6% duhanpirës, ndërsa Mali i Zi 23.8%. Në Kroaci, përqindja në vitin 2025 ishte 23.6%, me një rritje prej 2.7 pikësh përqindjeje kundrejt vitit 2022, kur niveli ishte 20.9%.

Niveli më i ulët i duhanpirësve aktivë në rajon u regjistrua në Slloveni, me 17.3%. Kjo përbën një rënie prej 0.6 pikësh përqindjeje nga viti 2022, kur përqindja ishte 17.9%. Shqipëria shënoi 15.1% në vitin 2022.

Në ndarjen sipas gjinisë, të dhënat tregojnë se duhanin e konsumonin çdo ditë 20.8% e burrave, ndërsa te gratë kjo përqindje ishte 12.6%.