Maqedonia e Veriut synon të sigurojë 1.3 miliardë euro hua në tregjet ndërkombëtare gjatë vitit 2027

Ministria e Financave ka nisur procedurat për një huamarrje të re prej 1,3 miliardë eurosh, pas miratimit të vendimit nga Qeveria.

Sipas dikasterit që drejtohet nga ministrja Gordana Dimitrievska-Koçoska, fondet pritet të merren në tregun ndërkombëtar gjatë vitit të ardhshëm. Megjithatë, data e realizimit të huamarrjes ende nuk është përcaktuar, pasi do të varet nga kushtet që do të ofrojë tregu. Mjetet do të përdoren për shlyerjen e detyrimeve të mëparshme.

Ministria e Financave bëri të ditur se paratë do të shërbejnë për financimin e deficitit buxhetor të vitit 2027, si dhe për pagesën e borxheve që maturohen nga huamarrjet e mëparshme. Në këtë shumë përfshihet edhe Euroobligacioni i emetuar në vitin 2023, i cili arrin afatin e shlyerjes në vitin 2027.

Sipas Ministrisë, huamarrja e planifikuar është në përputhje me Strategjinë Fiskale dhe Strategjinë për Borxhin Publik.

Vendimi është kundërshtuar nga LSDM-ja, e cila pretendon se fondet po sigurohen për qëllime zgjedhore dhe se arka e shtetit është bosh. Partia e drejtuar nga Venko Filipçe deklaron se gjatë 35 viteve të fundit të gjitha qeveritë kanë marrë borxh në vlerën e 8 miliardë eurove, ndërsa Qeveria e Mickoskit, sipas saj, ka shtuar borxhin me 4 miliardë euro brenda dy vitesh.

Të dhënat zyrtare për vitin 2026 tregojnë se borxhi publik i Maqedonisë së Veriut ka kaluar 10.7 miliardë euro, duke përbërë rreth 60% të Produktit të Brendshëm Bruto (PBB).