Maqedonia e Veriut numëron 90.020 të papunë dhe 101.022 të punësuar në mënyrë joformale

Gjatë tremujorit të dytë të vitit 2026, popullsia aktive në Maqedoninë e Veriut u rrit me 0,8% në krahasim me të njëjtën periudhë të vitit 2025. Në të njëjtën kohë, numri i të papunëve shënoi një rënie prej 1,5%.

Të dhënat e Entit Shtetëror të Statistikës tregojnë se popullsia aktive arrin në 798.718 persona. Prej tyre, 708.698 janë të punësuar dhe 90.020 të papunë. Shkalla e aktivitetit rezulton 52,5%, ajo e punësimit 46,6%, ndërsa papunësia është në nivelin 11,3%.

Mes personave të papunë, burrat përbëjnë 63,6% të totalit, ndërsa gratë 36,4%.

Edhe punësimi ka shënuar rritje, me 1% më shumë persona të punësuar. Në këtë grup, 57,7% janë burra dhe 42,3% gra.

Statistikat për tremujorin e dytë të vitit 2026 evidentojnë 101.022 persona të punësuar në mënyrë joformale, shifër kjo që është rritur me 7,2% kundrejt tremujorit pararendës.

Enti Shtetëror i Statistikës sqaron se kjo rritje lidhet kryesisht me shtimin e punësimit joformal në bujqësi, pylltari dhe peshkim. Në këta sektorë janë regjistruar 51.487 persona, ose 51% e të gjithë të punësuarve në mënyrë joformale. Ndërkohë, ndërtimtaria përfshin 17,2% të këtij grupi.

“Kjo strukturë tregon se aktivitetet sezonale në këta dy sektorë kanë ndikim kyç në lëvizjet tremujore të punësimit joformal”, theksojnë nga Enti Shtetëror i Statistikës.