LSDM: Qeveria e Mickoskit nuk veproi për rritjen e çmimeve dhe rënien e standardit

LSDM deklaron se qytetarët në Maqedoni prej muajsh po përballen me shtrenjtim të vazhdueshëm të produkteve në dyqane, tregje dhe kudo tjetër, ndërsa pagat kanë mbetur në vend dhe mirëqenia e tyre është përkeqësuar. Sipas partisë, shporta e konsumatorit, bashkë me qiranë, është ngjitur në afro 90,000 denarë, ndërsa paga mesatare ka pësuar rënie prej 1,163 denarësh.

Partia opozitare e cilëson këtë situatë si rezultat të politikave të gabuara dhe kriminale të Qeverisë së Mickoskit, e cila, sipas saj, nuk mori asnjë masë për mbrojtjen e standardit jetësor. LSDM thekson se karburantet u shtrenjtuan, me naftën që kaloi 100 denarë, ndërsa qeveria nuk ndërhyri për të ulur akcizat apo TVSH-në nga 18% në 5%.

Gjithashtu, nga LSDM thonë se nuk u realizua premtimi për rritjen e pagës minimale në 600 euro dhe se nuk pati rritje të pagave e pensioneve.

Sipas partisë, në këto rrethana, një masë e veçantë për sigurimin e furnizimit shkollor nuk do të mjaftojë. Prindërit, thuhet në reagim, kanë nevojë për të ardhura më të larta për t’u mundësuar fëmijëve vijimin e shkollës, ushqimin, ushqimet e lehta, veshmbathjen dhe shpenzimet e tjera që lidhen me arsimin. LSDM përfundon se qytetarët nuk janë prioritet për Qeverinë e Mickoskit, por interesat e biznesit.