LSDM: Projektligji për shtetësinë e dyfishtë duhet të rikthehet në Kuvend dhe të zbatohet pa përjashtime

LSDM deklaron se ka dorëzuar tashmë një projektligj për shtetësinë e dyfishtë dhe kërkon që ai të zbatohet për deputetët e përbërjes aktuale, ministrat, zyrtarët qeveritarë dhe drejtorët e ndërmarrjeve publike. Sipas kësaj partie, ligji duhet të jetë i njëjtë për të gjithë dhe të rikthehet në procedurë parlamentare.

Partia thekson se, ndërsa vijonin festimet për 35 vjet pavarësi, Ligji për Kufizimin e Shtetësisë së Dyfishtë të Zyrtarëve vijonte të mbetej i bllokuar.

Sipas LSDM-së, propozimi i saj parashikon një zgjidhje të qartë dhe të njëtrajtshme: zbatimin e ligjit për deputetët e përbërjes aktuale, ministrat, të gjithë zyrtarët qeveritarë, drejtorët e ndërmarrjeve publike dhe çdo mbajtës të një funksioni publik, pa përjashtime apo zgjidhje “gjysmëzemërshe”.

LSDM shprehet se nuk duhet të ketë standarde të dyfishta dhe as heshtje ndaj personave që e kanë propozuar vetë ligjin, por tani përpiqen ta shmangin atë. Partia kundërshton gjithashtu që zyrtarët që paguhen nga shteti të kenë besnikëri të ndarë. Për këtë arsye, ajo mbështet iniciativën e PLD-së dhe kërkon që ligji të futet menjëherë në rendin e ditës së Parlamentit, si dhe të miratohet pa vonesa e pa kompromis.

Në njoftimin e saj, LSDM-ja thotë se pavarësia dhe patriotizmi i vërtetë dëshmohen përmes besnikërisë ndaj një shteti, Maqedonisë. Partia shton se kjo nuk mund të zbatohet për Stoilkovicin, kolegët e tij nga BIA që festojnë Ratko Mlladiçin dhe kreun e medias Latas. Sipas LSDM-së, për nacionalistët e mëdhenj serbë dhe agjentët e shërbimit të sigurisë serbe kjo nuk mund të zbatohet, pasi ata duhet të kenë shtetësi të dyfishtë, të ndjekin agjendat serbe dhe ruse dhe të ndihen si në shtëpi si këtu, ashtu edhe atje. “Për të gjithë të tjerët – duhet të zbatohet”, thuhet në reagim.