LSDM kërkon publikimin e raportit të plotë për ujin e Gostivarit, gjashtë javë pas helmimit

Partia opozitare maqedonase LSDM ka reaguar për mungesën e raportit të plotë mbi cilësinë e ujit në Gostivar, edhe pse kanë kaluar gjashtë javë nga helmimi që preku një qytet të tërë dhe la mbi 5,000 njerëz të shtruar në spitale.

“Gjatë krizës, qytetarët u përballën me njoftime të ndryshme dhe kontradiktore. Fillimisht u tha se uji nuk ishte i sigurt për t’u pirë, ndërsa më pas u lejua vetëm për përdorim teknik. Toshkovski kreu hiperklorinim, e më vonë u deklarua se në ujë kishte baktere. Ishte një kaos i plotë. Ndërkohë, Mickoski dhe Klekovski shkuan në një ekskursion. Para përfundimit të tij, zyrtarët pinë ujë para kamerave, bënë një dolli të turpshme dhe deklaruan se ai ishte i sigurt për konsum”, shprehen nga LSDM.

Opozita pyet përse janë bërë publike vetëm disa pjesë të dokumentacionit dhe jo analiza e plotë e ujit.

“Ku ndodhet raporti i plotë për ujin në Gostivar? Kush vendosi që uji të rikthehej për përdorim të pijshëm dhe mbi bazën e cilave rezultate u mor ky vendim? Kush është personi që garanton, me emër, mbiemër dhe firmë, se uji është i sigurt? A po përpiqet dikush t’i shmanget përgjegjësisë në këtë mënyrë? Mickoski dhe Klekovski kanë detyrim ndaj qytetarëve të Gostivarit që të publikojnë të gjithë të vërtetën”, deklarojnë nga LSDM.