LSDM-ja: Ende pa asnjë përgjegjësi për ndotjen e ujit në Gostivar

Partia LSDM ka hedhur akuza se, megjithë justifikimet e shumta dhe përpjekjet për të zhvendosur fajin, institucionet ende nuk kanë mbajtur përgjegjësi për rastin e ujit të ndotur në Gostivar.

Sipas kësaj partie, ministri i Shëndetësisë, Sasho Klekovski, ka pranuar se institucionet nuk kanë reaguar me kohë, pasi, siç shprehen ata, nuk e kanë vënë re sinjalin e alarmit, gjë që për LSDM-në përbën konfirmim të dështimit të institucioneve.

Partia vuri në dukje se deri më tani asnjë institucion kompetent nuk e ka pranuar përgjegjësinë për atë që ndodhi, dhe se ekzekutivi, në vend që të japë shpjegime, po mundohet ta kalojë fajin te të tjerët.

Në deklaratën e LSDM-së theksohet se nëse një incident i tillë do të kishte ndodhur në një shtet anëtar të Bashkimit Evropian, autoritetet do të kishin dhënë llogari para prokurorit dhe do të ishin ndërmarrë procedurat e duhura ligjore.

Gjithashtu, LSDM-ja pretendon se pushteti gjyqësor ndodhet nën kontroll politik dhe pikërisht kjo mungesë e pavarësisë shkakton mungesën e përgjegjësisë institucionale. Ata shtojnë se pasojat po i vuajnë qytetarët, ndërsa asnjë prej autoriteteve nuk po mban përgjegjësi.