Karanfilova-Panovska akuzon Mickoskin për dëshmi të rreme lidhur me Alta Bankën: Të reagojë Prokuroria

Nënkryetarja e LSDM-së, Fani Karanfilova-Panovska, deklaroi në emisionin “Top Tema” të televizionit Telma se kryeministri Hristijan Mickoski ka dhënë të dhëna të pavërteta gjatë seancës së sotme mbikëqyrëse për Alta Bankën në Kuvend. Sipas saj, ai është përpjekur të shmangë përgjegjësinë politike për hyrjen e bankës në Maqedoni.

“Gjatë seancës së sotme mbikëqyrëse, kryeministri Hristijan Mickoski pati guximin të thoshte një gënjeshtër brutale si dëshmitar në këtë seancë publike dëgjimore”, u shpreh Karanfilova-Panovska.

Ajo tha se Mickoski u përpoq t’ia atribuonte përgjegjësinë qeverisë së mëparshme të LSDM-së, duke iu referuar dokumenteve përkatëse qeveritare. Megjithatë, sipas saj, përmbajtja e këtyre dokumenteve tregon të kundërtën e asaj që deklaroi kryeministri.

Karanfilova-Panovska theksoi se vendimi i marrë nga qeveria e LSDM-së synonte mbrojtjen e interesave shtetërore të vendit dhe të qytetarëve. Ajo e cilësoi deklaratën e Mickoskit si një përpjekje të drejtpërdrejtë për të mashtruar, të bërë publikisht përpara kryesuesit të seancës mbikëqyrëse, deputetëve dhe qytetarëve.

Nënkryetarja e LSDM-së kërkoi që të reagojë Prokuroria Publike, duke kujtuar se në raste të mëparshme dëshmitarët që kishin dhënë deklarata të rreme në seancat mbikëqyrëse ishin përballur me procedura prokuroriale.