Kallëzim penal në Maqedoni ndaj një polici që qëlloi me armë gjatë një feste familjare

Një kallëzim penal është dorëzuar nga Departamenti për Kontroll të Brendshëm, Hetime Kriminalistike dhe Standarde Profesionale në kuadër të Ministrisë së Punëve të Brendshme pranë Prokurorisë Themelore Publike kompetente për ndjekjen e krimit të organizuar dhe korrupsionit – Departamenti i Specializuar për ndjekjen e veprave penale të kryera nga persona me autorizime policore dhe nga pjesëtarë të policisë së burgjeve, kundër Z.R., nëpunës policor në Stacionin Policor për Mbikëqyrje Kufitare Çashkë.

Sipas njoftimit, ai dyshohet me bazë se ka kryer veprën penale “shkaktim i rrezikut të përgjithshëm”, të parashikuar në nenin 288 paragrafi 3 të Kodit Penal.

Siç bëhet e ditur, më 22.05.2026, polici i denoncuar ka qëlluar disa herë me armë zjarri në oborrin e shtëpisë së tij familjare, gjatë një feste familjare dhe në praninë e një numri të madh mysafirësh, duke vënë në rrezik jetën dhe integritetin fizik të personave që ndodheshin aty.

Nga MPB thonë se ndaj Z.R. do të paraqitet edhe propozim për nisjen e procedurës për përcaktimin e përgjegjësisë për shkelje të rendit dhe disiplinës së punës, ndërsa do të shqiptohen edhe masat e detyrueshme disiplinore, si dhe masa e largimit të përkohshëm nga vendi i punës deri në përfundimin e procedurës disiplinore – pezullim nga detyra.