IOM: Maqedonia përballet me rënie të lindshmërisë dhe krizë demografike

Raporti Botëror i Migracionit 2026 i IOM vlerëson se Evropa ndodhet përballë transformimeve të mëdha strukturore, ndërsa kriza demografike mbetet një prej sfidave qendrore të rajonit. Sipas raportit, kjo situatë mund të rëndohet në dekadat e ardhshme, me Maqedoninë që renditet mes vendeve më të prekura.

Maqedonia bën pjesë në grupin e shteteve ku lindshmëria ka zbritur nën nivelin e zëvendësimit të popullsisë. Gjendja vështirësohet më tej nga emigrimi i personave në moshë riprodhuese, pasi largimi i të rinjve pakëson kapacitetin demografik të vendit në të ardhmen.

Të dhënat e analizuara për periudhën 2005-2024 tregojnë se Luksemburgu, Malta dhe Irlanda kanë regjistruar shtim të popullsisë. Ndërkohë, një pjesë e madhe e vendeve, sidomos në Evropën Lindore dhe në Ballkan, kanë shënuar rënie të konsiderueshme.

Edhe për Maqedoninë, ashtu si për shumë shtete të tjera të përfshira në këtë grup, projeksionet paralajmërojnë vazhdimin e prirjes negative nëse nuk zbatohen politika efektive për rritjen e fertilitetit dhe ndalimin e largimit të fuqisë së re punëtore.(koha.mk)