Investim i ri i “Kromberg & Schubert” në Manastir, do të hapen 2.000 vende pune për prodhimin e pjesëve të “Audi”-t

Kompania gjermane “Kromberg & Schubert” do të nisë një projekt të ri në Manastir, ku do të prodhohen komponentë për gjigantin automobilistik “Audi”. Kryeministri Hristijan Mickoski bëri të ditur se investimi pritet të krijojë 2.000 vende të reja pune gjatë katër viteve të ardhshme.

“Sot bëjmë të ditur një lajm të rëndësishëm për ekonominë vendase. Kompania “Kromberg & Schubert” po fillon një projekt të ri investues, përmes të cilit, gjatë katër viteve të ardhshme, parashikohet hapja e 2.000 vendeve të reja të punës. Aty do të prodhohen komponentë automobilistikë për gjigantin gjerman të automobilave “Audi”. Nuk kam nevojë t’ju kujtoj se çfarë është “Audi” dhe çfarë rëndësie ka për industrinë automobilistike”, tha Mickoski.

Sipas kryeministrit, në fabrikën që ndodhet në zonën industriale “Zhabeni” do të prodhohen sisteme për një model të ri të “Audi”-t. Kapaciteti i parashikuar i prodhimit është më shumë se 3.000 tufa kabllosh në ditë.

Drejtori i “Kromberg & Schubert”, Gjorgji Trenkovski, tha se kompania synon t’i sigurojë brenda vendit 2.000 punonjësit, duke u mbështetur te kuadri profesional në Maqedoni.

“Do t’i kontaktojmë të gjithë inxhinierët dhe operatorët që janë në dispozicion, si dhe personat e papunë që ndoshta dëshirojnë ta ndryshojnë vendin e punës. Nëse nuk arrijmë t’i plotësojmë të gjitha vendet e punës, keni të drejtë që kuota për punëtorët e huaj është rritur dhe do të veprojmë me kujdes edhe në atë drejtim. Pra, vendimi për projektin tashmë është marrë: ai do të realizohet në Maqedoni dhe do t’i kemi ato vende pune. Na lejoni që, përmes punës operative, të shohim se nga do të vijnë punonjësit”, tha Trenkovski.

Ky do të jetë projekti i katërt investues i “Kromberg & Schubert” në vend. Me realizimin e tij, Mickoski pret që numri i përgjithshëm i të punësuarve në fabrikë të shkojë në 10.000.

Parashikohet gjithashtu që gjatë vitit të ardhshëm kompania të eksportojë më shumë se 400 milionë euro nga kapacitetet e saj prodhuese në vend, ndërsa punonjësve t’u ofrohen vende pune me paga më të larta.

Kryeministri theksoi se pagat mesatare në këtë kompani, sidomos për punonjësit me kualifikim të lartë, janë mbi 80 për qind më të larta se mesatarja në Maqedoni.