Ilire Dauti pengon vijimin e seancës dhe kërkon që Mickoski t’i përgjigjet pyetjes parlamentare

Seanca plenare kushtuar pyetjeve të deputetëve në Kuvendin e Maqedonisë së Veriut u ndal dy herë gjatë ditës së sotme. Shkak u bë deputetja e Lidhjes Shqiptare, Ilire Dauti, e cila qëndroi në foltore dhe kërkoi nga kryeministri Hristijan Mickoski përgjigje për një pyetje parlamentare që, sipas saj, kishte mbetur pa përgjigje prej disa javësh.

Tensionet nisën pasi Mickoski iu përgjigj deputetit dhe kryetarit të LSDM-së, Venko Filipçe. Dauti pretendoi se kryeministri e kishte anashkaluar sërish pyetjen e saj, ndaj zuri foltoren dhe bëri të ditur se nuk do ta lironte atë pa marrë përgjigje.

Deputetja deklaroi se atë ditë nuk do të largohej nga foltorja derisa t’i jepej përgjigje për pyetjen e parashtruar herën e kaluar. Ajo kërkoi që kryeministri të dilte dhe të përgjigjej, duke paralajmëruar se, në të kundërt, seanca nuk do të vazhdonte më tej.

Në rrjedhën e këtyre zhvillimeve, deputeti Rijad Shaqiri kërkoi fjalën për çështje procedurale. Kryetari i Kuvendit, Afrim Gashi, hasi vështirësi për ta vijuar seancën për shkak se Dauti nuk pranonte të largohej nga foltorja, ndërsa në krah të saj qëndroi edhe deputeti dhe kryetari i Aleancës për Shqiptarët, Zijadin Sela.

Reagime pati gjithashtu nga anëtarë të Qeverisë të pranishëm në sallë. Gashi vendosi ta pezullonte fillimisht seancën për 30 minuta, por edhe pas rifillimit vijuan përplasjet procedurale. Deputeti i LSDM-së, Fatmir Bytyqi, e akuzoi kryeministrin se po u shmangej me qëllim përgjigjeve për pyetjet parlamentare.