Ilço Gjorgjioski lirohet nga paraburgimi kundrejt garancisë prej 500 mijë eurosh

Gjykata ka vendosur të lirojë nga paraburgimi ish-presidentin e Federatës së Futbollit të Maqedonisë (FFM), Ilço Gjorgjioski, duke e zëvendësuar këtë masë me lirim me kusht dhe masa paraprake.

Vendimi u konfirmua nga Gjykata Themelore Penale në Shkup, e cila bëri të ditur se masa e paraburgimit ndaj Gjorgjioskit është hequr.

Për lirimin e tij, Gjorgjioski depozitoi një garanci bankare në vlerën 500,000 euro. Sipas Gjykatës Penale, edhe Prokuroria dha mendim pozitiv për pranimin e garancisë dhe heqjen e paraburgimit.

Në këto kushte, Gjorgjioski do ta presë vijimin e procesit gjyqësor duke respektuar masat paraprake të vendosura.

Nga paraburgimi janë liruar edhe dy persona të tjerë, Tomislav Mladenovski dhe Gjoko Çubrinovski, siç konfirmoi Gjykata Penale. Edhe për ta, kjo masë është zëvendësuar me lirim me kusht dhe masa paraprake.

Pjesë e së njëjtës lëndë është gjithashtu një tjetër ish-president i FFM-së, Muamed Sejdini, i cili më herët kishte ofruar garanci në shumën 1,000,000 euro.

Ndonëse fillimisht u raportua se ndaj Gjorgjioskit do të vendosej arrest shtëpiak, Gjykata Penale sqaroi në përgjigjen e saj se paraburgimi ishte hequr dhe ishte caktuar garanci e shoqëruar me masa paraprake.

Procesi gjyqësor vijon, ndërsa të pandehurit e liruar nga paraburgimi janë të detyruar të zbatojnë masat e përcaktuara nga gjykata.