Ilaçi “Foster” sërish pa kosto shtesë për të siguruarit në Maqedoni, njofton MSH-ja

Ministria e Shëndetësisë në Maqedoni ka bërë të ditur se duke filluar nga muaji aktual, qytetarët me sigurim shëndetësor do të kenë mundësi të tërheqin sërish ilaçin “Foster” nëpër barnatore, pa u detyruar të paguajnë ndonjë shumë shtesë.

Bazuar në njoftimin zyrtar, institucioni është vënë në dijeni nga kompania që zotëron autorizimin për tregtimin e këtij medikamenti, pjesë e Listës Pozitive të Barnave, se janë ndërmarrë disa ndryshime në favor të pacientëve që e përdorin atë.

Nga ky muaj e tutje, të siguruarit do të paguajnë vetëm tarifën ligjore të participimit për marrjen e barit me recetë, pa asnjë kosto tjetër. Kjo praktikë zbatohet njësoj edhe për medikamentet e tjera që përmbajnë të njëjtat substanca aktive dhe shërbejnë për mjekimin e sëmundjes pulmonare obstruktive kronike.

Në komunikatën e MSH-së theksohet se ministria ndërmerr veprime të vazhdueshme për të përmirësuar aksesin dhe disponueshmërinë e barnave me çmime më të leverdisshme për pacientët.