Hapet aplikimi për studimet e vitit akademik 2026/2027

Sot dhe nesër zhvillohet afati i parë i aplikimit për kandidatët që synojnë të regjistrohen në vitin e parë në Universitetin “Shën Kirili dhe Metodi” në Shkup. Universiteti më i vjetër dhe më i madh në vend ka vënë në dispozicion gjithsej 8.851 vende në 23 fakultete për vitin akademik 2026/2027, i cili nis më 1 tetor.

Konkursi i USHKM-së përcakton se 4.395 nga vendet e lira u takojnë studentëve të rregullt në kuotën shtetërore, studimet e të cilëve financohen nga buxheti i shtetit. Për studentët e rregullt që bashkëfinancojnë studimet duke paguar tarifë shkollimi janë parashikuar 3.621 vende, ndërsa 835 vende janë rezervuar për studentët e çrregullt.

Kapacitetet më të mëdha, me mbi 500 studentë në programe të ndryshme studimore, i ofrojnë Fakulteti i Mjekësisë me 950 vende, FSHKIK me 800, FETI dhe makineria me nga 600, Fakulteti matematiko-natyror me 626, Fakulteti ekonomik me 655, Fakulteti i drejtësisë me 555, Fakulteti filozofik me 635 dhe Fakulteti filologjik me 805 vende.

Për studentët e regjistruar në kuotën shtetërore, tarifa e studimeve është 200 euro në kundërvlerë denarësh. Ndërkaq, studentët në kuotën e bashkëfinancimit dhe ata të çrregullt duhet të paguajnë tarifë shkollimi prej 400 eurosh.

Në një intervistë për AIM, ministrja e Arsimit dhe Shkencës, Vesna Janevska, bëri të ditur se këtë vit numri i vendeve në të gjitha universitetet është zvogëluar me rreth 2.000. Sipas saj, vendimi pasoi analizën e tregut të punës, e cila tregoi se disa profesione kanë tepricë kuadrosh dhe papunësi, ndërsa në profesione të tjera punësimi është shumë i lartë dhe vërehet mungesë.

Janevska deklaroi se, mbi bazën e këtyre të dhënave, kuotat u reduktuan në mënyrë përkatëse dhe në përqindje në të gjitha universitetet. Ajo theksoi se, megjithëse kuotat u ulën edhe vitin e kaluar, pret që edhe këtë vit të mbeten vende të paplotësuara. Kjo ndodh sepse universitetet dhe fakultetet i shpallin kuotat në përputhje me akreditimet e marra, të cilat parashikojnë shifra të larta, ndërsa në disa fakultete një pjesë e vendeve vazhdimisht nuk plotësohet.

Ministrja u shpreh thellësisht e bindur se, pavarësisht uljes me rreth 2.000 vende në të gjitha universitetet, çdo student do të mund ta gjejë vendin në drejtimin që dëshiron. Reduktimet më të mëdha, sipas saj, janë bërë në profilet e biznes-administrimit, administratës publike, në disa drejtime të Fakultetit Ekonomik dhe Juridik, si dhe në profilet mjekësore, pasi në këto fusha evidentohet një numër më i madh të papunësh.

Nga ana tjetër, kuotat për profilet teknike, informatikën, makinerinë dhe ndërtimtarinë kanë mbetur pothuajse të pandryshuara. Janevska sqaroi se punësueshmëria në këto drejtime është në nivel të shkëlqyer dhe në disa raste arrin deri në 98-99 për qind.

Pasi të mbyllet afati i parë i aplikimit për studime në USHCM, që mbahet sot dhe nesër, ranglista përfundimtare do të shpallet më 27 gusht. Kandidatët e pranuar do të regjistrohen më 3 dhe 4 shtator. Afati i dytë për aplikim në USHKM është caktuar për 10 dhe 11 shtator, kurse afati i tretë do të zhvillohet më 23 shtator në fakultetet ku do të kenë mbetur vende të lira.

Çdo kandidat i interesuar, përpara aplikimit brenda afateve të konkursit, duhet të regjistrohet në www.upisi.ukim.mk dhe të plotësojë aplikacionin elektronik në sistemin iKnow. Numri që sistemi elektronik i aplikimit ia gjeneron automatikisht kandidatit duhet të vendoset edhe në aplikacionin që dorëzohet gjatë procedurës së regjistrimit. Dokumentacioni paraqitet në zyrën e pyetjeve studentore të fakultetit të përzgjedhur.