Gjorgievski: Ribalancimi i ri i buxhetit rrit investimet kapitale në Shkup

Kryetari i Qytetit të Shkupit, Orce Gjorgievski, ka bërë të ditur se është miratuar ribalancimi i ri i buxhetit të qytetit.

Duke u mbështetur në rezultatet e korrikut dhe gushtit, ai njoftoi se “po vjen tremujori i tretë më i mirë në historinë e Qytetit të Shkupit”.

Gjorgievski theksoi se nuk po krijohen borxhe të reja, por po shlyhen ato të vjetrat, se investimet kapitale nuk po shkurtohen, përkundrazi po rriten dhe se çdo denar po drejtohet drejt qytetarëve dhe zhvillimit të Shkupit. Ai shtoi se puna do të vazhdojë edhe më fuqishëm, me angazhim, rezultate dhe një vizion të qartë për të ardhmen e qytetit.

Me këtë rishikim buxhetor janë paraparë projekte të reja, përfshirë ndërtimin e një ure dhe të një rruge që do të lidhin Gjorgje Petrovin me Sarajin, duke krijuar një hyrje të re në Shkup. Për këtë projekt janë parashikuar 420 milionë denarë.

Po ashtu janë siguruar 61 milionë denarë për Shkupin 2028 – Kryeqytetin Evropian të Kulturës, fonde shtesë për pacientët onkologjikë, 25 milionë denarë për rikonstruksionin e rrugëve më të vogla dhe 10 milionë denarë për pastrimin e deponive, raporton Telegrafi.