Gjendja e krizës për naftën dhe derivatet mbetet në fuqi deri më 20 tetor

Qeveria ka vendosur të zgjasë gjendjen e krizës për shkak të mundësisë së çrregullimeve në furnizimin me naftë dhe produkte të saj. Kjo masë do të zbatohet në periudhën nga 21 korriku deri më 20 tetor.

Sipas njoftimit qeveritar, vazhdimi i kësaj gjendjeje krijon mundësi për ndërhyrje më të shpejtë nëse paraqiten vështirësi në furnizim apo rritje të konsiderueshme të çmimeve në tregjet ndërkombëtare.

“Qëllimi i këtij vendimi është që Qeveria të ketë një mekanizëm të përshtatshëm ligjor për reagim të shpejtë dhe efikas, me qëllim ruajtjen e stabilitetit të furnizimit, zbutjen e pasojave nga çrregullimet eventuale të tregut dhe mbrojtjen e interesave dhe standardit jetësor të qytetarëve dhe ekonomisë”, theksohet në kumtesën e shërbimit për shtyp të Qeverisë.

Vendimi, pasi të harmonizohet përmes procedurave qeveritare, do t’i përcillet Kuvendit për shqyrtim dhe miratim, në pajtim me kompetencat ligjore.

Shërbimi për shtyp i Qeverisë bëri të ditur se institucionet do të monitorojnë nga afër zhvillimet në tregjet vendore dhe ndërkombëtare të energjisë. Në rast se situata e kërkon, Qeveria do të marrë masa të përshtatshme dhe në kohë për të garantuar furnizim të sigurt, të qëndrueshëm dhe pa ndërprerje me naftë dhe derivate të naftës.