Filipçe: Qeveria mburret me 50 milionë euro, ndërsa Mali i Zi siguron 3.2 miliardë euro grante nga BE

Kreu i LSDM-së, Venko Filipçe, deklaroi se e ashtuquajtura “Platformë” po përdoret për të larguar vëmendjen e opinionit nga ajo që ai e cilësoi si “debakël total të qeverisë”, duke shtuar se në vend që të diskutohet për dështimet e ekzekutivit, vëmendja po kthehet sërish te LSDM-ja.

Në një paraqitje në “Sitel”, Filipçe u shpreh: “Çfarë po arrihet? Defokus i plotë. Në vend që të diskutojmë për këtë debakl të qeverisë, izolimin nga Evropa, ndikimet pro-ruse në vendin tonë, qëndrimet pro-ruse të qeverisë së Hristijan Mickoskit, personalisht, debaklin me buxhetin, mungesën e parave për pensione, paga, transferta sociale, bujqësi e kështu me radhë, kreditë ultra të shtrenjta, përfshirë atë hungareze, ne përsëri po debatojmë për veten tonë”.

Sipas tij, ribalancimi i buxhetit paraqet një provë të qartë të dështimit ekonomik të qeverisë së Mickoskit.

Filipçe theksoi: “Rritje e madhe e deficitit, nuk parashikohen para për një rritje adekuate të pensioneve, pensionistët janë tradhtuar, as për një rritje të pagave. Nuk ka para të mjaftueshme për subvencione në bujqësi. Nuk ka para të mjaftueshme për të rritur transfertat sociale. Gjithçka është status quo”.

Ai vlerësoi gjithashtu se Maqedonia po mbetet prapa, ndërkohë që vendet e rajonit po avancojnë dhe po shfrytëzojnë miliarda euro nga fondet evropiane, duke humbur kështu para, reforma dhe kohë.

“Zhvillimi i vërtetë vjen nga fondet e pakthyeshme të Bashkimit Evropian. Dhe kështu janë ndryshuar dhe zhvilluar të gjitha vendet. Greqia, Bullgaria, Kroacia, kanë përdorur miliarda euro nga Evropa”, tha Filipçe.

Në fund, ai theksoi se Qeveria po krenohet me 50 milionë euro, ndërsa Mali i Zi siguron 3.2 miliardë euro në grante./Telegrafi/