Ferati dhe Rokas: Partneriteti me BE-në synon institucione më të fuqishme dhe zhvillim të barabartë

Agon Ferati, ministër i Marrëdhënieve ndërmjet Bashkësive, zhvilloi sot një takim me ambasadorin e Bashkimit Evropian, Michalis Rokas, njoftoi Ministria.

Në qendër të bisedës ishin përparimi i integrimit evropian dhe roli i marrëdhënieve të mira mes bashkësive, të cilat u cilësuan si një ndër bazat kryesore për krijimin e një shoqërie të qëndrueshme dhe demokratike.

Palët i kushtuan rëndësi të posaçme angazhimit aktiv të të rinjve në vendimmarrje, si dhe sigurimit të mundësive të barabarta për të gjithë qytetarët, si parakushte për një shoqëri gjithëpërfshirëse.

Ferati dhe Rokas trajtuan gjithashtu nevojën për fuqizimin e kapaciteteve institucionale të Ministrisë së Marrëdhënieve ndërmjet Bashkësive. Synimi është të rritet efikasiteti gjatë përgatitjes dhe zbatimit të politikave që ndihmojnë në forcimin e kohezionit shoqëror.

Sipas njoftimit, të dy bashkëbiseduesit vlerësuan mbështetjen e pandërprerë të Bashkimit Evropian për projektet që nxisin zhvillimin e barabartë të rajoneve dhe përmirësojnë cilësinë e jetesës së qytetarëve.

Ministri Ferati falënderoi për partneritetin me Bashkimin Evropian dhe konfirmoi gatishmërinë për zgjerimin e bashkëpunimit në nisma që fuqizojnë bashkëjetesën, zhvillimin e institucioneve dhe perspektivën evropiane të vendit./Telegrafi/