Ethet e Nilit Perëndimor shkaktojnë 10 viktima, Maqedonia e Veriut kryeson rajonin për numrin e të infektuarve

“Maqedonia e Veriut ka regjistruar numrin më të lartë të viktimave nga Ethet e Nilit Perëndimor. Ministri i Shëndetësisë e ka konfirmuar këtë dhe ka thënë se numri i të prekurve është më i madh se në 15 vitet e fundit. A lidhet kjo me keqmenaxhimin institucional, apo qytetarët i raportojnë simptomat me vonesë?”, tha gazetarja Arta Kalisi.

Ekspertët vënë në dukje se nuk kryhen rregullisht kontrolle entomologjike dhe se mungon mbikëqyrja e shpendëve e kafshëve, të cilat bëjnë pjesë në ciklin e përhapjes së virusit.

“Spërkatja ajrore, siç është konstatuar, nuk ka mundur ta ndalë përhapjen e sëmundjes. Ajo mbetet një mënyrë ndërhyrjeje, por nuk mjafton. Këtë vit është shënuar numri më i lartë, si pasojë e menaxhimit të dobët të epidemisë; barrën e kësaj situate po e përballojnë qytetarët me shëndetin e tyre”, deklaroi ekspertja Renata Mladinovska.

Rënia e temperaturave nuk e ka larguar ende rrezikun e sëmundjeve që përhapen nga mushkonjat. “Evropa ka paralajmëruar se kërcënimi nga këto sëmundje vazhdon. Në vendin tonë mbizotëron ende ideja se spërkatja është zgjidhja e vetme. Por ajo nuk përbën një sistem për kontrollin e sëmundjes, por vetëm një masë parandaluese. Nevojitet qasja ‘One Health’, që ndërthur shëndetin publik, veterinarinë, epidemiologjinë, entomologjinë dhe shkenca si ekologjia. Duket se kjo qasje ende mungon në vendin tonë”, theksoi Mladinovska.

Këtë javë u shënua viktima e dhjetë nga Ethet e Nilit Perëndimor, duke e renditur Maqedoninë e Veriut të parën në rajon për numrin e viktimave. Në periudhën 2011-2025, në vend ishin konfirmuar gjithsej 54 raste dhe ishin regjistruar 5 viktima. Vetëm këtë vit, numri i të prekurve ka arritur në 70.