Doganierët në “Tabanocë”, “Qafë Thanë” dhe “Bllacë” pajisen nga sot me kamera trupore

Në vendkalimet kufitare “Tabanocë”, “Qafë Thanë” dhe “Bllacë”, Drejtoria e Doganave ka aktivizuar 30 kamera trupore për punonjësit doganorë, të siguruara përmes një donacioni nga Departamenti i Drejtësisë i SHBA-së.

Pajisjet do të regjistrojnë procedurat gjatë ushtrimit të detyrave, ndërsa materialet e filmuara mund të shërbejnë më pas si prova në procedura kundërvajtëse dhe penale.

Sipas drejtorit të Doganave, Boban Nikollovski, përdorimi i këtij sistemi ka për qëllim forcimin e sigurisë së punonjësve, shtimin e transparencës dhe përmirësimin e luftës kundër korrupsionit.

Zëvendësuesja e ambasadorit amerikan, Nicole Warns, deklaroi se këto pajisje do të kontribuojnë në parandalimin e veprimtarive të jashtëligjshme, si dhe në përballjen me trafikun e drogës, trafikimin e qenieve njerëzore dhe krimin e organizuar.

Warns shtoi se ky donacion është pjesë e partneritetit ndërmjet SHBA-së dhe Maqedonisë së Veriut.