Dimitrovski: Me Bullgarinë kërkojmë dialog evropian, jo mesjetar

Një perspektivë e besueshme për anëtarësimin në Bashkimin Evropian është thelbësore për stabilitetin dhe sigurinë e rajonit, ndërsa politika e zgjerimit të BE-së mbetet një faktor kyç për demokratizimin, forcimin e sundimit të ligjit dhe zhvillimin e marrëdhënieve të mira fqinjësore. Kështu deklaroi sot ministri i Punëve të Jashtme dhe Tregtisë së Jashtme, Zoran Dimitrovski, gjatë takimit të ministrave të jashtëm të Procesit të Berlinit, që po zhvillohet në Przhno të Malit të Zi.

Takimi u përqendrua te integrimi evropian, bashkëpunimi rajonal, si dhe rritja e stabilitetit dhe sigurisë në Ballkanin Perëndimor. Sipas deklaratës së zyrës së ministrit, në këtë takim morën pjesë ministrat e Punëve të Jashtme të vendeve të Ballkanit Perëndimor dhe të Shteteve Anëtare të BE-së, të përfshira në Procesin e Berlinit, krahas përfaqësuesve të lartë të Komisionit Evropian, Këshillit të Bashkëpunimit Rajonal dhe Zyrës Rajonale të Bashkëpunimit Rinor.

Gjatë fjalës së tij, Dimitrovski nënvizoi se siguria e Ballkanit Perëndimor përbën një nevojë evropiane dhe nuk mund të shihet vetëm si çështje e rajonit. Në një realitet të ndërlikuar gjeopolitik dhe përballë ndikimit në rritje nga aktorët e jashtëm, ai kërkoi vijimin e dialogut në nivel rajonal dhe evropian.

Ministri paralajmëroi gjithashtu se mosmarrëveshjet dypalëshe nuk duhet të shndërrohen në pengesa për rrugën drejt Bashkimit Evropian. Sipas tij, një qasje e tillë dëmton perspektivën evropiane dhe cenon sigurinë e qëndrueshmërinë e vendeve të rajonit dhe të vetë Evropës.

“Me fqinjin tonë lindor duam një dialog evropian, jo mesjetar, një dialog për të ardhmen, jo për historinë. Në procesin e pranimit në BE, duhet të transformojmë institucionet dhe të ndërtojmë një shtet të së drejtës, jo të ndryshojmë identitetin apo narrativën historike”, deklaroi Dimitrovski./Telegrafi/