Dimitrievski paralajmëron daljen e ZNAM-it nga qeveria nëse provimi i jurisprudencës zhvillohet në shqip

Provimi i jurisprudencës duhet të zhvillohet vetëm në gjuhën maqedonase, sipas kryetarit të Lëvizjes ZNAM, Maksim Dimitrievski. Ai tha se partia e tij nuk do të pranojë mbajtjen e provimit në një gjuhë tjetër dhe është gati të largohet nga koalicioni qeveritar nëse Qeveria vendos ndryshe.

Dimitrievski deklaroi se kryeministri Hristijan Mickoski është në dijeni të qëndrimit të ZNAM-it, ndërsa theksoi gatishmërinë e partisë për të diskutuar mbi këtë temë me partnerët e koalicionit.

Ai njoftoi se në takimin e ardhshëm me kryeministrin do të kërkojë një takim liderësh. Sipas tij, çështja nuk është diskutuar asnjëherë hapur me partnerët në Qeveri dhe një takim i tillë do të shërbente për të përcaktuar vijat e kuqe, si edhe për të shqyrtuar se çfarë do të nënkuptonte kjo në të ardhmen për shtetin dhe sistemin e drejtësisë.

Kreu i ZNAM-it e sheh provimin e jurisprudencës si pjesë të një çështjeje më të gjerë, që lidhet me funksionimin e drejtësisë dhe rregullimin shtetëror. Ai pretendoi se kërkesat për ta zgjeruar përdorimin e shqipes në këtë fushë kanë pas tyre synime më të gjera politike dhe se në vend ka forca që duan ta kthejnë një ditë shtetin në konfederatë.

Sipas Dimitrievskit, ndonëse Maqedonia është republikë, individë të caktuar bëjnë vazhdimisht thirrje për më shumë të drejta dhe për bashkimin e komuniteteve lokale mbi baza etnike, jo territoriale. Ai përmendi edhe një deklaratë pas përfundimit të zgjedhjeve lokale në Bërvenicë, kur, sipas tij, një ish-lider i partive shqiptare tha se ishte koha të shpallej Ilirida.

Dimitrievski argumentoi se Maqedonia nuk mund të mbetet thjesht republikë nëse avancimi i të drejtave të caktuara të komuniteteve të tjera etnike, të cilat i shfrytëzojnë këto të drejta, konsiderohet një e drejtë kushtetuese që e komplikon më tej shtetin. Sipas tij, kjo ia thjeshton çështjen një grupi të vogël qytetarësh që janë pjesë përbërëse e shtetit, por e ndërlikon procesin për të gjithë të tjerët.

Kërkesat për mbajtjen e provimit edhe në shqip, të cilat ai tha se po i imponohen në mënyrë naive opinionit publik, bien ndesh, sipas tij, me rekomandimet e Komisionit të Venecias të vitit 2019 për përdorimin në drejtësi të një gjuhe tjetër përveç maqedonishtes. Ai paralajmëroi pasoja të mëdha për funksionimin e sistemit të drejtësisë në vend.

Dimitrievski sqaroi se nuk kundërshton përdorimin e gjuhëve të komuniteteve etnike joshumicë dhe solli si shembull Kumanovën, ku shumëgjuhësia zbatohet në punën e Këshillit të Komunës. Megjithatë, ai tha se as vetë dhe as partia që drejton nuk do të lejojnë komplikimin e mëtejshëm të shtetit.