Dimitrieska-Koçoska: Investimet me mbështetjen e BE-së po modernizojnë doganën

“Doganën po e transformojmë në një institucion modern, efikas dhe të sigurt.” Kështu deklaroi ministrja e Financave në vendkalimin kufitar Tabanovcë, ku u prezantuan rezultatet e projekteve të përfunduara me sukses në kuadër të Dokumentit aksional “BE-ja kundër krimit të organizuar, me mbështetje për tregtinë”. Vlera e mbështetjes së Bashkimit Evropian për projektin arrin rreth 4 milionë euro.

Ministrja theksoi se investimi nuk duhet parë vetëm në raport me pajisjet e siguruara, por mbi të gjitha si mbështetje për një institucion me rëndësi të veçantë për shtetin. Sipas saj, dogana ka rol në mbrojtjen e interesave financiare, në luftën kundër krimit të organizuar dhe ndërkufitar, si dhe në krijimin e kushteve për zhvillimin e një tregtie më të shpejtë dhe më të thjeshtuar.

Në kuadër të ndihmës së BE-së janë siguruar pajisje të specializuara dhe teknologji bashkëkohore për kontrolle e hetime, pajisje dhe softuerë IT, si edhe automjete të reja për ekipet doganore mobile dhe njësinë K-9. Këto investime, sipas ministres, përmirësojnë kushtet e punës së nëpunësve doganorë, rrisin mobilitetin dhe forcojnë aftësinë për zbulimin e parandalimin e tregtisë së paligjshme dhe krimit ndërkufitar.

Një drejtim tjetër ku po përqendrohen investimet është digjitalizimi. Ky proces pritet të ulë numrin e procedurave administrative, të lehtësojë qasjen në sistemet doganore dhe të shkurtojë kohën e përfundimit të procedurave.

“Zhvillimi i sistemeve EORI2 dhe i platformës për menaxhimin e unifikuar të identiteteve të përdoruesve dhe nënshkrimit dixhital përbën një hap të rëndësishëm drejt një qasjeje të vetme, më të thjeshtë dhe më të sigurt dixhitale në shërbimet doganore. Kjo është veçanërisht e rëndësishme për operatorët ekonomikë. Për administratën doganore, këto sisteme sjellin të dhëna më të plota e cilësore, siguri më të madhe dhe ndërlidhje më të mirë mes sistemeve”, tha ministrja.

Ajo shtoi se ndryshimet janë pjesë e harmonizimit me standardet doganore evropiane dhe e përgatitjeve për integrimin në Tregun e Vetëm dhe në Bashkimin Doganor të Bashkimit Evropian.

Ministrja vuri në dukje gjithashtu rëndësinë e krijimit të kushteve të përshtatshme për nëpunësit doganorë, pasi një institucion i fuqishëm ndërtohet edhe falë punës së njerëzve që i zbatojnë çdo ditë këto standarde. Në këtë kuadër, ajo shprehu mirënjohje për partneritetin e vazhdueshëm me Bashkimin Evropian, përmes të cilit gjatë periudhës së kaluar janë realizuar disa projekte në mbështetje të administratës doganore, përfshirë edhe vendkalimin kufitar Tabanoc.

Përmes Programit IPA 1, deri tani janë zbatuar me sukses disa projekte që kanë ndihmuar në përmirësimin e proceseve dhe të sistemit të punës doganore. Me financim prej 1.8 milionë eurosh është kryer rikonstruksioni dhe zgjerimi i objekteve për zhdoganim dhe inspektim.

Ndërkohë, me mbështetje në vlerë prej 1 milion eurosh janë realizuar prokurime për avancimin e proceseve në vendkalimin kufitar Tabanoc. Në këtë kuadër janë blerë automjete, pajisje GPS për monitorimin e mjeteve, pajisje IT dhe multifunksionale, pajisje zyre, veshje mbrojtëse për kontrollet zyrtare, si dhe pajisje të tjera për kryerjen e këtyre kontrolleve, theksoi ministrja.